Áskeri qairatker, polkovnik Kim Serikbaev 87 jasynda dúnieden ozdy. Qaraly habardy Almaty qalasy Medeý aýdany ákiminiń apparaty áleýmettik sala bólimi mamandary Sputnik Qazaqstan tilshisine rastady.
Polkovnik ómiriniń sońǵy jyldarynda Medeý aýdany ardagerler keńesiniń tóraǵasy qyzmetin atqarǵan.
Kim Serikbaiuly 1934 jyly 14 qańtarda Aqtóbe oblysy Hromtaý aýdany Kóptoǵai aýylynda týǵan.
1952-1956 jyldary Qazaq memlekettik ýniversitetinde, Ýfa áskeri ýchilishesinde bilim aldy. 1970 jyly Máskeýdegi áskeri akademiiany bitirdi.
1956-1966 jyldary Qiyr Shyǵys, Prikarpate, Máskeý, Orta Aziia áskeri okrýgterinde vzvod, rota, batalon komandiri, motoatqyshtar polkynda shtab bastyǵy, polk komandiri bolyp qyzmet atqarǵan.
1970-1973 jyldary Máskeýdegi áskeri akademiiada Kýbadan, Mońǵoliiadan kelgen ofitserlerge jalpy taktikadan sabaq bergen.
1973-1975 jyldary Almaty joǵary áskeri komandalyq ýchilishesinde kafedra bastyǵy, 1975-1988 jyldary Almaty joǵary partiia mektebinde kafedra bastyǵy boldy.
1988-1991 jyldary Baýyrjan Momyshuly atyndaǵy respýblikalyq áskeri mektep-internattyń bastyǵy qyzmetin atqardy.
1992-1993 jyldary memlekettik qorǵanys komiteti tóraǵasynyń keńesshisi boldy.
1994-1996 jyldary minstrler kabineti janyndaǵy memlekettik attestatsiia komitetinde arnaýly máseleler jónindegi bas sarapshy boldy.
1996-1999 jyldary QR parlamentiniń májilis apparatynda qorǵanys jáne qaýipsizdik máseleler jónindegi keńesshi qyzmetin atqarǵan.
Kim Serikbaiuly 180 ǵylymi eńbektiń avtory.
"Synovnii dolg", "Byt patriotom", "Na kafedre taktiki", "Baýyrjan Momyshýly v moei jizni", "Dobromý delý – dolgaia jizn", "Voennaia bezopasnost strany: problemy, perspektivy", "Nadejnyi straj Rodiny", "Obretennoi nezavisimosti – nadejnýiý zashitý", "Batyr aǵanyń shapaǵaty" kitaptaryn jazǵan.
