Foto: Aikyn.kz
Májilis depýtaty Nartai Sársenǵaliev áskerdegi álimjettik áli de órship tur degen pikirde, dep habarlaidy "Ult aqparat" inbusiness.kz saityna silteme jasap.
"Elin, memleketin, Otanyn qorǵaimyn dep áskerge shabytpen attanǵan balalar tabytpen oralmaýy kerek. Ózimiz kórip jatyrmyz, sap-saý ketken balalar áskerge barady, 5-10 myń teńgeden árkimnen aqsha suraidy, eń sońynda múgedek bolyp tósekke tanylyp kelip jatyr. Osydan keiin "áskerge balańdy jiber, Otan qorǵaýy kerek" dep biz qai ata-anaǵa aitamyz, kimdi mindetteimiz, kimdi úgitteimiz – suraq osynda. Sondyqtan da men áskerdegi álimjettik áli de órship tur degen pikirdemin. Muny joqqa shyǵara almaimyz",- dedi halyq qalaýlysy Úkimet úiiniń kýlýarynda.
Sózinshe, áskerdegi álimjettikten zardap shekken balalarǵa qatysty tergeýdi de muqiiat qaraý kerek.
"Jýyrda bizdiń baýyrymyz (red. – sarbaz Erbaian Muhtar) zardap shekti. Almatyda qaraldy, qazir úiine oraldy. Halqymyz 200 mln teńgeden astam qarjy jinap berdi. Biraq dardai balanyń áskerdegi ájethananyń ishinde qulap, basyn jaryp aldy degeni aqylǵa qona ma, joq pa? Men bul nusqaǵa múldem senbeimin. Sondyqtan da áskerdegi álimjettikti toqtatý kerek, reforma qajet. Jýrnalistik mansabymda tiisti ministrlikpen suhbattasqan kezde olar barlyq jerge beinebaqylaý kameralaryn qoiamyz dedi, barlyq jerge qoiylsa, ol beinekamera men nátijesi qaida? (...) Áskerden bólek, sol bolǵan jaǵdaidy tekseretin, tergeitin organdardyń arasynda qandai da bir sybailastyq bar ma degen mende kúmán týady. Muny joqqa shyǵara almaimyn. Bul máselemen jiti ainalysýymyz kerek", - dedi Sársenǵaliev.
Ol áskerge tolyqqandy reforma jasaý qajet degen pikirde.
Óz kezeginde Densaýlyq saqtaý ministri Aqmaral Álnazarova áskerden múgedek bop oralǵan Erbaian Muhtarǵa qatysty pikir bildirdi.
"Meditsinalyq kómektiń áskeri vedomstvolyq qyzmettiń mamandarymen kórsetiletinin aita ketý kerek. Biraq biz Densaýlyq saqtaý ministrligi óz tarapynan bul máseleni ustap otyr. Tiisti konsiliým júrgizýge, basqa da kómek kórsetýge tolyǵymenen daiynbyz. Biz bul jumysty atqaryp jatyrmyz. Negizi DSM tarapynan bul másele baqylaýda", - dedi ol.
Sózinshe, ásker qatarynda boryshyn ótep júrgen jas sarbazdardyń densaýlyǵyna tiisti meditsinalyq komissiia qaraidy.
