Sýǵa qatysty máseleler Úkimet pen jergilikti biliktiń baqylaýynda bolýy tiis. Bul týraly QR Parlamenti Senaty tóraǵasynyń orynbasary Asqar Shákirov aitty, dep habarlaidy QazAqparat.
«Jyl saiyn sý tasqyny kezeńinde biz drenaj júiesi men nóserlik kárizdiń qaraýsyz qalýymen, al jekelegen jaǵdailarda – olardyń múldem bolmaýy jaǵdailarymen betpe-bet kelemiz. Kóptegen eldi mekender zardap shegip, adamdar baspana men múlikterin joǵaltady, al memleket ekonomikalyq shyǵyndarǵa tap bolyp jatady. Biyl Aqmola, Soltústik Qazaqstan jáne Túrkistan oblystary sý apatyna dýshar boldy», - dedi Asqar Shákirov «Qazaqstannyń sý qaýipsizdigi: qazirgi kezdegi qaýip-qaterler jáne olardy sheshý perspektivalary» taqyrybyna arnalǵan Úkimet saǵatynda.
Onyń atap ótýinshe, gidrometeorologiialyq qyzmetterdi tolyq qarjylandyrmaý, gidrotehnikalyq qurylystar salýdy jetkiliksiz jobalaý, sý basý qaýpi bar ýchaskelerde obektilerdi zańsyz salý jáne basqa da máseleler Úkimet pen jergilikti bilik organdary tarapynan turaqty baqylaýda bolýǵa tiis.
«Ózderińiz biletindei, sý qaýipsizdigi máselelerine Senat depýtattary erekshe nazar aýdarady. Jaqynda Senatta Qaraǵandy oblysynyń jáne Tótenshe jaǵdailar ministrliginiń basshylyǵymen kezdesý ótti. Onda tótenshe jaǵdailardyń saldaryn joiýǵa emes, aldyn alýǵa kóńil bólindi. Basqasha aitqanda, bar problemalardy naqty taldaý, jaǵdaidyń damýyn boljaý jáne mindetterdi keshendi sheshý qajet. Búgin osy suraqtarǵa jaýap alyp, odan ári sharalar men usynystardy talqylaimyz dep úmittenemiz», - dedi Senat tóraǵasynyń orynbasary.
