QR Premer-Ministri Asqar Mamin Jańǵyrtý jónindegi ulttyq komissiia otyrysyn ótkizdi, dep habarlaidy "Ult aqparat" Úkimet basshysynyń resmi saityna silteme jasap.
QR Tuńǵysh Prezidenti – Elbasy Nursultan Nazarbaevtyń Bes institýtsionaldyq reformasyn iske asyrý jónindegi «100 naqty qadam» ult josparynyń jáne Memleket basshysy Qasym-Jomart Toqaevtyń 2020 jylǵy 1 qyrkúiektegi Qazaqstan halqyna arnaǵan joldaýynyń oryndalý barysy qaraldy.
Atqarylyp jatqan jumystar týraly Premer-Ministrdiń orynbasary – syrtqy ister ministri Muhtar Tileýberdi, ulttyq ekonomika ministri Áset Erǵaliev, aýyl sharýashylyǵy ministri Saparhan Omarov, energetika ministri Nurlan Noǵaev, qarjy ministri Erulan Jamaýbaev, bilim jáne ǵylym ministri Ashat Aimaǵambetov, indýstriia jáne infraqurylymdyq damý ministriniń birinshi orynbasary Qaiyrbek Óskenbaev, ekologiia, geologiia jáne tabiǵi resýrstar vitse-ministri Ahmetjan Pirimqulov baiandady.
Qazirgi tańda Ult josparynyń 100 qadamynyń 72-si iske asyryldy: «Kásibi memlekettik apparatty qalyptastyrý» baǵyty boiynsha 15 qadamnyń 13-i, «Zań ústemdigin qamtamasyz etý» baǵyty boiynsha barlyq 19 qadam, «Indýstriialandyrý jáne ekonomikalyq ósim» boiynsha 50 qadamnyń 27-i, «Biregeilik jáne birlik» baǵyty boiynsha 6 qadamnyń 3-i, «Esep beretin memleketti qalyptastyrý» baǵyty boiynsha barlyq 10 qadam oryndaldy. Biyl «Kásibi memlekettik apparatty qalyptastyrý» jáne «Indýstriialandyrý men ekonomikalyq ósim» baǵyttary boiynsha 9 qadamdy oryndaý kózdelgen. Otyrysta memlekettik qyzmetshilerge eńbekaqy tóleýdiń jańa júiesine kóshý, mektepte oqytý standarttaryn jańartý jáne fýnktsionaldyq saýattylyqty damytý, ekonomikanyń energiia tiimdiligin arttyrý, jer qoinaýyn paidalaný salasynyń ashyqtyǵy men boljamdylyǵyn arttyrý, aýyl sharýashylyǵynda sý shyǵynyn azaitý, sondai-aq salyqtyq mindettemelerdi oryndaýdy, onyń ishinde tsifrlandyrý arqyly jeńildetý máseleleri qaraldy. Jańa infraqurylymdyq jobalardy iske asyrý, servisti jetildirý jáne tranzittik tasymaldar jyldamdyǵyn arttyrý arqyly kólik-tranzittik sektordyń básekege qabilettiligin arttyrý jónindegi jumystardyń barysy talqylandy.
Premer-Ministr QR Tuńǵysh Prezidenti – Elbasy Nursultan Nazarbaevtyń Bes institýtsionaldyq reformasyn iske asyrý jónindegi «100 naqty qadam» ult josparyn jáne Memleket basshysy Qasym-Jomart Toqaevtyń 2020 jylǵy 1 qyrkúiektegi joldaýyn tolyq ári sapaly oryndaý boiynsha belsendi jumysty jalǵastyrýdy tapsyrdy.
Ekonomikanyń basym sektorlaryndaǵy jańa iri jobalarǵa strategiialyq investorlardy tartý, óńdeý sektory men eksporttyq áleýetti damytý, negizgi azyq-túlik taýarlary boiynsha ulttyq ekonomikanyń jetkilikti bolýyn qamtamasyz etý jónindegi tarmaqtarǵa erekshe nazar aýdaryldy.
