QR Premer-Ministriniń birinshi orynbasary Asqar Mamin jumys saparymen Almatyda boldy.
A. Mamin Gate City jobasy iske asyrylyp jatqan Almaty aglomeratsiiasynyń soltústigindegi spýtnik-qalanyń qurylys barysymen tanysty.
Qazirgi tańda Gate City spýtnik-qalasynda sýmen, elektrmen, gazben qamtý, jol infraqurylymy nysandary turǵyzylyp, jylý jelileriniń qurylysy júrgizilýde. 2017 jyly indýstrialdy aimaqta alty joba, sonymen qatar alǵashqy turǵyn keshenderi qolǵa alynady.
QR Premer-Ministriniń birinshi orynbasary, sondai-aq, «Soltústik ainalym - Bókeihanov» kólik túiininiń qurylysyn tekserip qaitty. Kólik túiinin 2017 jylǵy jeltoqsanda paidalanýǵa berý josparda bar. Perspektivti ótkizý qabileti – táýligine 361 177 avtokólik.
Sapar barysynda A. Mamin 2017 jyldyń birinshi jartyjyldyǵynda «Altyn Orda» bazary aýdanyndaǵy Almaty-Bishkek jolynyń ýchaskesine qaita qurý jumystaryn bastaýdy tapsyrdy. Bul ýchaske Almatyǵa kirip/shyǵatyn barynsha kóp paidalanylatyn jol. QR Premer-Ministriniń birinshi orynbasary, sonymen qosa, kelesi jyldyń birinshi jartyjyldyǵynda uzyndyǵy 66 km (6-8 jolaq) bolatyn Úlken Almaty ainalma avtokólik jolynyń qurylysyn memlekettik-jekemenshik áriptestik jaǵdaiynda bastaýdy tapsyrdy.
Jumys sapary barysynda A. Mamin Almatynyń Alataý aýdanynyń soltústik-batys bóliginde ornalasqan Indýstriialyq aimaqta boldy. Jalpy aýdany 490 ga bolatyn indýstriialyq aimaq alty óndiristik sektorǵa bólingen. Bul azyq-túlik, mashina qurastyrý, qurylys, farmatsevtika, himiia jáne jeńil ónerkásip. Indýstriialyq aimaq aýmaǵynda A. Mamin «BRB APK» JShS jylý kesheniniń jumysymen tanysty. Jylyjaidan táýligine 20 tonnaǵa deiin kókónis jinalady.
Budan keiin QR Premer-Ministriniń birinshi orynbasary qalanyń Áýezov aýdanynda ornalasqan «Dostyq» metro stantsiiasynyń qurylys barysyn qadaǵalady. Jańa stantsiia Abai dańǵylyn boilai, júrgin bólik astynda Momyshuly kóshesinen batysqa qarai turǵyzylatyn bolady.
«Almaty úshin metropolitenniń damýy óte mańyzdy, «Sary-Arqa» men «Dostyq» eki jańa stantsiialarynyń paidalanýǵa berilýin esepke alǵanda, jolaýshylar aǵyny táýligine 45-ten 90 myń jolaýshyǵa deiin artady», - dedi A. Mamin.
Eki jańa stantsiia 2020 jylǵa qarata iske qosylady dep josparlanǵan.
Jumys saparynyń qorytyndysy boiynsha Almaty q. ákimdiginde Almaty aglomeratsiiasyn damytý máseleleri boiynsha keńes ótkizildi.
A. Mamin Memleket basshysy Nursultan Nazarbaevtyń Almaty aglomeratsiiasyn damytý máselesine erekshe nazar aýdaratynyn aityp ótti.
«Sapar barysynda Gate City spýtnik-qalasynyń infraqurylymyn, jańa metro stanitsiiasyn damytý máseleleri, qalanyń kólik syzbasyn jetildirý jáne indýstrialdy jobalardy iske asyrý máseleleri qarastyryldy. Bular dál osy zamanaýi aglomeratsiiany qalyptastyrýǵa yqpal etetin jobalar. Almaty aglomeratsiiasy – eldiń qarqyndy damýynyń mańyzdy núkteleriniń biri. Álemdik tájiribe kórsetkendei, aglomeratsiialar – ekonomikalyq lokomotivter», - dep sózin túiindedi A. Mamin.
.jpeg)