Óner ne úshin kerek? Aýada qalqyp júrgen, kópti tolǵandyratyn, biraq formasyn tappaǵan oilardy, tiisti formasyna salyp,"shekpen jaýyp" ózine qaitarý úshin. Keide.
Almatydaǵy (modnyi) "ARTiShok" teatrynyń "Uiat" degen dramasyn (nakonets-to) kórip sony oiladyq. Spektaklde biz kelisetin jáne kelispeitin kóp oilar aityldy. Biraq negizgi arqaýy - "uiat pen nadandyqty shatastyryp alǵan" (A.Sarym) qazaqtyń minezderi. Alǵashqy áser - taqyryp tolyq ashylmady. Degenmen. Búgingi kún týraly kóp qoiylymdardan aiyrmashylyǵy - aiyptaý joq. "Zaman týraly aitamyz" dep shaqyryp alyp, eki saǵat boiy aqyl aityp shyǵaryp salatyn akademiialyq teatrlar siiaqty emes. Bizde Avtorlar teatrǵa kelgen adamdy tárbielep jiberýge, pozitsiiasyn astarlap emes, tepsinip turyp qaq shekeden qoiyp qalýǵa sheber ǵoi. Problemany aityp turyp, kósemsózge urynbaǵan, pafos pen patetikanyń salqyny timegen shyǵarmany kezdestirý neken-saiaq.
"Uiatta" qoǵamdy zertteý, saraptama jasaýǵa umtylys bar. Aýyldyń qazaǵyna syrt kózben qaraidy, qalanyń qazaǵyna ironiiasy bar. ekeýin bóliip turǵan temir sharbaǵy bar.Nátijesinde búgingi iiý-qiiý, bir-birimen qabyspaityn, bólek tilderde sóileitin, bólek álemderde ómir súretin qazaqtardyń (qazaqstandyqtardyń) bolmysy týraly shynaiy qoiylym kórdik.
Sondyqtan da onyń (arzan emes) biletteri eki apta buryn satylyp ketedi.
Dramatýrgterge (prozashylarǵa da) jaqut syrǵa. Ózimiz týraly jibi túzý qoiylym kórý úshin Ýkrainadan dramatýrg shaqyrtý mindet emes shyǵar. Jan-jaqtaryńyzǵa qarasańyzdarshy. Nebir oqiǵa bolyp jatyr ǵoi. "Uiat" onyń bireýin ǵana aityp tur. "Sábiin týaletke tastap ketetin analar qaidan shyqty?". "El bilip qoimasyn" degen kórbiltelikten" deidi. Jalǵyz shyndyq osy bolmaýy múmkin. Óz pikirińizdi usynyńyz. Sendire alsańyz. Al "Uiattyń" jaǵdaiynda zertteýge degen talpynys qundy.
Óitkeni búgingi adamdar týraly Áýezovpen, Gogolmen ǵana emes, óz zamandasyńmen pikirleskiń keledi. Keide.
Ásiia Baǵdáýletqyzynyń feisbýktaǵy jazbasynan
