«AsiaCredit Bank» AQ banktik, ózge operatsiialardy jáne baǵaly qaǵazdar naryǵyndaǵy qyzmetti júrgizýge arnalǵan litsenziiadan aiyryldy. Qazaqstannyń depozitterge kepildik berý qory AsiaCredit Bank salymshylaryna aqsha qalai qaitarylatynyn túsindirdi, dep habarlaidy «Ult aqparat».
«AsiaCredit Bank» AQ jeke tulǵalardyń depozitterine mindetti kepildik berý júiesiniń qatysýshysy bolyp tabylady, iaǵni jeke tulǵalar men dara kásipkerlerdiń salymdarynda, aǵymdaǵy shottary men tólem kartochkalarynda ornalastyrylǵan aqshalaryna «Qazaqstannyń depozitterge kepildik berý qory» AQ (QDKBQ, Qor) kepildigi qoldanylady.
Agenttik banktiń aktivteri men mindettemelerin basqa bankke bir mezgilde berý operatsiiasyn júrgizýden bas tartqan jaǵdaida, QDKBQ salymshylarǵa kepildik berilgen ótemdi tóleý sharasyn júzege asyrady. Qor ótem tóleýdi bastaý kúnin zańnamada bekitilgen merzimde habarlaidy.Tólemderdi júzege asyrý sharasy jaily resmi habarlama Qor saitynda jáne buqaralyq aqparat quraldarynda jariialanǵan kúnnen bastap, 5 jumys kúni ishinde bastalady», - delingen habarlamada.
Eske salamyz, QDKBQ kepildik berilgen ótemdi bank litsenziiasynan aiyrylǵan kúnge qarai eseptelgen syiaqyny eskere otyryp,depozittegi qaldyq soma sheginde tóleidi:
- teńgedegi jinaq depozitter boiynsha – 15 mln teńgeden;
- teńgedegi basqa depozitter boiynsha – 10 mln teńgeden;
- shetel valiýtasyndaǵy depozitter boiynsha – valiýta balamasynda 5 mln teńgeden aspaidy (bank litsenziiasynan aiyrylǵan kúni belgilengen valiýta aiyrbastaý baǵamy boiynsha).
Jeke tulǵa nemese dara kásipkerdiń bankte túri men valiýtasy boiynsha eki jáne odan da kóp kepildendirilgen depozitteri bar bolsa, Qor olar boiynsha 15 mln teńgeden aspaityn kólemde kepildik berilgen jiyntyq ótem tóleidi. Bul rette shetel valiýtasyndaǵy depozittiń 5 mln teńgeden aspaityn kepildendirilgen qaldyǵy boiynsha shekteý eskeriledi.
Kepildik berilgen shekti somadan asatyn depozitter boiynsha Qor joǵaryda atap kórsetilgenindei, tek bekitilgen somany ǵana óteidi.Al ótelmei qalǵan artyq aqsha boiynsha salymshylar bankti májbúrlep taratý týraly sot sheshimi zańdy kúshine engen soń, banktiń taratý komissiiasyna ótinish bere alady.
QDKBQ salymshylarǵa kepildik berilgen ótemdi tóleý úshin konkýrstyq negizde agent bankti tańdaidy. Salymshynyń ótinishi boiynsha onyń aqshasy agent banktiń kassasynan qolma-qol aqshamen nemese qoldanystaǵy bank shotyna qolma-qol aqshasyz aýdarý arqyly berilýi múmkin. Salymshy kepildik berilgen ótemdi alý úshin agent bankke barǵan kezde jeke basyn kýálandyratyn kýáligi bolsa jetkilikti. Tolyq nusqaýlyq Qor saitynda ornalastyrylǵan .
Aita keteiik,«AsiaCredit Bank» AQ baǵaly qaǵazdar naryǵynda qyzmetti júrgizý litsenziiasynan aiyryldy.
