QR Aqparat jáne qoǵamdyq damý ministri Aida Balaeva «Ashyq biýdjetter» portalynyń jumysyn halyqqa jetkizýde kemshilik bar ekendigin aitty, dep habarlaidy QazAqparat.
Aqparatqa qol jetkizý máseleleri jónindegi komissiianyń otyrysynda QR Qarjy ministrliginiń ókili «Ashyq biýdjetter» portalyn jetildirý boiynsha jumys josparynyń oryndalýy jaiynda esep bergen bolatyn. Osy oraida ministr bul baǵytta úlken jumys atqarylyp jatqanymen kemshilikterdiń de bar ekendigine nazar aýdartty.
«Úlken jumys atqarylyp jatyr. Biraq, ókinishke orai halyq osyndai jumys atqarylyp jatqanyn bilmeidi. Sondyqtan halyqty aqparattanyrý máselesin qolǵa alý kerek. Jalpy qazirgi tańda memlekettiń qarajaty qalai jumsalyp jatqany jáne onyń tiimdi jaratylýy, ár jobanyń júzege asyrylý barysy barlyq azamatymyzdy mazalaidy. Osyǵan orai «Ashyq biýdjetter« portalynyń bar ekendigin, onda memlekettik organdar qarajattarynyń barlyǵy halyqqa ashyq ekendigin kórsetý kerek. Mundai aqparattandyrý jumysy júrgizilip jatqan joq. Kópshilik osyndai úlken portal bar ekenin, barlyq memlekettik organdardyń bir portalǵa jumyldyrylǵanyn bilmeidi. Bul ózekti máselelerdi biri. Óitkeni, kóptegen másele halyqtyń túsinbeýinen týyndap jatady», - dedi Aida Balaeva.
Ministr «Ashyq biýdjetter» portalynyń bar ekenin halyqqa keńinen jetkizý qajettigin basa aitty.
«Ár memlekettik organnyń qarajatty igerýi osy jerde jazylyp tur degen aqparat bolýy kerek. Biz de sizderge óz tarapymyzdan kómekteseiik», - dedi ol Qarjy ministriniń ókiline.
Aita keteiik, Aida Balaevanyń tóraǵalyǵymen onlain formatta ótken Aqparatqa qol jetkizý máseleleri jónindegi komissiianyń otyrysynda múmkindigi shekteýli adamdardyń aqparatqa qol jetkizý máseleleri, memlekettik organdardyń ashyqtyq deńgeiin jyl saiynǵy baǵalaýdyń negizgi qorytyndylary, memlekettik organdardyń internet-resýrstarynyń biryńǵai tuǵyrnamasynyń jumysy, sondai-aq «Ashyq biýdjetter» portalyn jetildirý boiynsha jumys josparynyń oryndalýy talqylandy.
