Senat Tóraǵasy Sátbaev qalasy men Shornaq aýylynda bolǵan oqiǵalarǵa qatysty pikir bildirdi, dep habarlaidy "Ult aqparat".
«Taiaýda ǵana Sátbaev qalasy men Shornaq aýylynda bolǵan oqiǵalar el kóńiline qaiaý túsirdi. Qazirgi tańda halqymyz bul máselelerge bailanysty úlken alańdaýshylyq bildirip otyr.
Sátbaevtaǵy jaǵdaiǵa qatysty qoǵamnyń narazylyǵy oryndy. Rasymen, bul oqiǵa bárimizdiń júregimizdi aýyrtyp, janymyzdy jabyrqatty. Barlyq ata-analardyń ashýy men yzasy da túsinikti. Degenmen, osyndai qylmyskerlerdi jazalaý zań negizinde júrgizilýi kerek. Búldirshinge zorlyq-zombylyq kórsetkender zań aldynda qatań jaýap beredi. Ol – aqiqat nárse. Eshkimniń buǵan kúmáni bolmaýy kerek.
Byltyr Memleket basshysy halyqqa Joldaýynda bala quqyǵyn qorǵaý máselesine airyqsha nazar aýdaryp, olarǵa qatysty jasalatyn qylmystarǵa jazany kúsheitý týraly tapsyrma bergen bolatyn. Soǵan bailanysty Parlament Qylmystyq kodekske irgeli ózgerister engizdi. Búginde búldirshinderge qatysty jasalǵan zorlyq-zombylyq faktisi boiynsha qylmysker jiyrma jylǵa nemese ómir boiyna bas bostandyǵynan aiyrylýy múmkin.
Sonymen qatar, zorlyq-zombylyq áreketi orta sanattan aýyr dárejeli qylmys túrine ózgertildi. Mundai jaǵdaida taraptar tatýlasa almaidy. Burynǵy tájiribede taraptardyń ózara tatýlasýynyń nátijesinde talai adamnyń qylmystan jaltaryp ketkeni belgili. Endi ondai olqylyqqa jol joq.
Jańa zań normalaryna sáikes mundai qylmys jasaǵandar túrmeden merziminen buryn bosap ta shyǵa almaidy, raqymshylyqqa da ilinbeidi. Sondyqtan qoldanystaǵy zańnama boiynsha qylmyskerlerdi bultartpas aýyr jaza kútip tur.
Shornaqta áleýmettik-turmystyq janjal oryn alǵany belgili. Biraq muny keibireýler etnosaralyq janjalǵa ainaldyrǵysy kelip, jelilerde jalǵan aqparattar, zańsyz áreketterge shaqyrǵan úndeýler taratýda.
Desek te, biz quqyqtyq memlekette ómir súrip jatyrmyz. Sol sebepti, kez kelgen másele zań sheńberinde sheshilýi kerek. Sonda ǵana zań ústemdigi ornaǵan, ár azamattyń quqyǵy qorǵalatyn, qaýipsizdigi qamtamasyz etiletin órkenietti qoǵam qura alamyz.
Qazirgi tańda indetpen betpe-bet kelgen elimiz kúrdeli kezeńdi bastan ótkerýde. Osyndai syn-saǵatta birligimizge syzat túsirmeý – asa mańyzdy. Sol úshin ár nárseni aqylǵa jeńdirip, áreket eteiik», dep jazdy Máýlen Áshimbaev óziniń jelidegi paraqshasynda.
