سەنات تٶراعاسى سەتباەۆ قالاسى مەن شورناق اۋىلىندا بولعان وقيعالارعا قاتىستى پٸكٸر بٸلدٸردٸ, دەپ حابارلايدى "ۇلت اقپارات".
«تاياۋدا عانا سەتباەۆ قالاسى مەن شورناق اۋىلىندا بولعان وقيعالار ەل كٶڭٸلٸنە قاياۋ تٷسٸردٸ. قازٸرگٸ تاڭدا حالقىمىز بۇل مەسەلەلەرگە بايلانىستى ٷلكەن الاڭداۋشىلىق بٸلدٸرٸپ وتىر.
سەتباەۆتاعى جاعدايعا قاتىستى قوعامنىڭ نارازىلىعى ورىندى. راسىمەن, بۇل وقيعا بەرٸمٸزدٸڭ جٷرەگٸمٸزدٸ اۋىرتىپ, جانىمىزدى جابىرقاتتى. بارلىق اتا-انالاردىڭ اشۋى مەن ىزاسى دا تٷسٸنٸكتٸ. دەگەنمەن, وسىنداي قىلمىسكەرلەردٸ جازالاۋ زاڭ نەگٸزٸندە جٷرگٸزٸلۋٸ كەرەك. بٷلدٸرشٸنگە زورلىق-زومبىلىق كٶرسەتكەندەر زاڭ الدىندا قاتاڭ جاۋاپ بەرەدٸ. ول – اقيقات نەرسە. ەشكٸمنٸڭ بۇعان كٷمەنٸ بولماۋى كەرەك.
بىلتىر مەملەكەت باسشىسى حالىققا جولداۋىندا بالا قۇقىعىن قورعاۋ مەسەلەسٸنە ايرىقشا نازار اۋدارىپ, ولارعا قاتىستى جاسالاتىن قىلمىستارعا جازانى كٷشەيتۋ تۋرالى تاپسىرما بەرگەن بولاتىن. سوعان بايلانىستى پارلامەنت قىلمىستىق كودەكسكە ٸرگەلٸ ٶزگەرٸستەر ەنگٸزدٸ. بٷگٸندە بٷلدٸرشٸندەرگە قاتىستى جاسالعان زورلىق-زومبىلىق فاكتٸسٸ بويىنشا قىلمىسكەر جيىرما جىلعا نەمەسە ٶمٸر بويىنا باس بوستاندىعىنان ايىرىلۋى مٷمكٸن.
سونىمەن قاتار, زورلىق-زومبىلىق ەرەكەتٸ ورتا ساناتتان اۋىر دەرەجەلٸ قىلمىس تٷرٸنە ٶزگەرتٸلدٸ. مۇنداي جاعدايدا تاراپتار تاتۋلاسا المايدى. بۇرىنعى تەجٸريبەدە تاراپتاردىڭ ٶزارا تاتۋلاسۋىنىڭ نەتيجەسٸندە تالاي ادامنىڭ قىلمىستان جالتارىپ كەتكەنٸ بەلگٸلٸ. ەندٸ ونداي ولقىلىققا جول جوق.
جاڭا زاڭ نورمالارىنا سەيكەس مۇنداي قىلمىس جاساعاندار تٷرمەدەن مەرزٸمٸنەن بۇرىن بوساپ تا شىعا المايدى, راقىمشىلىققا دا ٸلٸنبەيدٸ. سوندىقتان قولدانىستاعى زاڭناما بويىنشا قىلمىسكەرلەردٸ بۇلتارتپاس اۋىر جازا كٷتٸپ تۇر.
شورناقتا ەلەۋمەتتٸك-تۇرمىستىق جانجال ورىن العانى بەلگٸلٸ. بٸراق مۇنى كەيبٸرەۋلەر ەتنوسارالىق جانجالعا اينالدىرعىسى كەلٸپ, جەلٸلەردە جالعان اقپاراتتار, زاڭسىز ەرەكەتتەرگە شاقىرعان ٷندەۋلەر تاراتۋدا.
دەسەك تە, بٸز قۇقىقتىق مەملەكەتتە ٶمٸر سٷرٸپ جاتىرمىز. سول سەبەپتٸ, كەز كەلگەن مەسەلە زاڭ شەڭبەرٸندە شەشٸلۋٸ كەرەك. سوندا عانا زاڭ ٷستەمدٸگٸ ورناعان, ەر ازاماتتىڭ قۇقىعى قورعالاتىن, قاۋٸپسٸزدٸگٸ قامتاماسىز ەتٸلەتٸن ٶركەنيەتتٸ قوعام قۇرا الامىز.
قازٸرگٸ تاڭدا ٸندەتپەن بەتپە-بەت كەلگەن ەلٸمٸز كٷردەلٸ كەزەڭدٸ باستان ٶتكەرۋدە. وسىنداي سىن-ساعاتتا بٸرلٸگٸمٸزگە سىزات تٷسٸرمەۋ – اسا ماڭىزدى. سول ٷشٸن ەر نەرسەنٸ اقىلعا جەڭدٸرٸپ, ەرەكەت ەتەيٸك», دەپ جازدى مەۋلەن ەشٸمباەۆ ٶزٸنٸڭ جەلٸدەگٸ پاراقشاسىندا.
