«Parlamenttik kanikýl» degenimiz dástúrli demalys emes. Bul jóninde Senat Tóraǵasy Máýlen Áshimbaev facebook-tegi paraqshasyna jazdy, dep habarlaidy "Ult aqparat".
Máýlen Áshimbaev óz jazbasynda Parlamenttiń ótken sessiiadaǵy jumysyna toqtalyp, qabyldanǵan keibir normalarǵa nazar aýdarǵan.
«Ótken sessiiada Parlament Memleket basshysynyń ekonomikany qalpyna keltirý jáne pandemiiamen kúres jumystaryna qatysty barlyq bastamasyn zańnamalyq turǵydan qamtamasyz etkenin erekshe atap ótken jón», – dedi Senat Tóraǵasy.
Sondai-aq, ol parlamenttik kanikýlǵa shyqqan senatorlardyń óz óńirlerinde jáne elordada indetpen kúres jumystaryna belsene atsalysyp júrgenin aitqan.
«Búginde depýtattar óz óńirlerinde jumys isteýde. «Parlamenttik kanikýl» degenimiz dástúrli demalys emes. Bul – eń aldymen, jumysty Parlament qabyrǵasynan tys jerde jalǵastyrý degen sóz. Qazirdiń ózinde senatorlar aldaǵy sessiiada qaralatyn zań jobalarymen jeke jumys istep jatyr», – delingen jazbada.
Indetke bailanysty qabyldanǵan shekteý sharalary depýtattardyń aimaqtardaǵy saparyna da aitarlyqtai áser etkenin aitqan Senat Tóraǵasy halyqpen kezdesýlerdiń aldaǵy ýaqytta ótkiziletinine nazar aýdarǵan.
«Karantin kezinde azamattarmen jappai kezdesýden bas tartýǵa týra keldi. Biraq karantin aiaqtalyp, epidemiologiialyq jaǵdai jaqsarǵan soń halyqpen kezdesýler mindetti túrde ótkiziledi. Búginde aimaqtarǵa barǵan senatorlar Memleket basshysy bergen tapsyrmalardyń oryndalý barysyn qadaǵalap, baqylaý júrgizýde. Dári-dármek pen meditsinalyq quraldar jetispei jatsa, sol túitkildi dereý kóterip, ortalyq jáne jergilikti memlekettik organdardy jumyldyrý arqyly máseleniń oń sheshilýine septikterin tigizip jatyr», – deidi Máýlen Áshimbaev.
Sonymen qatar ol indet kezindegi qaiyrymdylyq isterge de toqtalyp ótken.
«Depýtattarymyz halyqpen birge óz qarajattary esebinen azamattardyń jáne meditsinalyq mekemelerdiń qajettiligi úshin qoldaý kórsetýde. Kópshiligi bul áreketterin jariia túrde jasap jatqan joq. Jasaǵan qaiyrymdy isterin jariialaý ne jariialamaý – árkimniń jeke qalaýy. Degenmen, qazirgidei jaǵdaida qaiyrymdylyq piardyń quralyna ainalyp ketpeýi kerek dep esepteimin», – degen Senat Tóraǵasy Qurban ait qarsańynda qolǵa alynǵan jańa bastamany da tilge tiek etken.
«Qurban ait qarsańynda senatorlar meditsinalyq qyzmetkerlerdi qoldaýǵa baǵyttalǵan aktsiiaǵa belsendi qatysyp jatyr. Biyl Qazaqstan musylmandary dini basqarmasynyń «Zeket qory» depýtattarmen jáne eriktilermen birlesip dárigerler men meditsinalyq qyzmetkerlerdiń otbastaryna azyq-túlik qorjyndaryn taratýdy uiymdastyryp otyr. Men bul izgi bastama qazaqstandyqtar tarapynan úlken qoldaý tabady dep oilaimyn», – deidi Máýlen Áshimbaev.
Sondai-aq, Senat Tóraǵasy pandemiiamen kúres jumystaryna ár azamattyń úles qosý kerektigin atap ótken.
«Koronavirýs adamdardy áleýmettik mártebesine, turmys jaǵdaiyna, jynysyna, etnikalyq sipatyna qarai bólmeidi. Sondyqtan pandemiiamen kúres – jalpyulttyq kúres degen sóz. Osy jaǵdaida senatorlar azamattardyń densaýlyǵyn qorǵaýǵa jáne daǵdarystan keiingi kezeńde ekonomikany qalpyna keltirýge baǵyttalǵan jumysyn jalǵastyra beredi. Barlyq múddeli azamattarmen jáne uiymdarmen yntymaqtasa jumys istep, birlesip áreket etýge daiynbyz», – delingen Máýlen Áshimbaevtyń jazbasynda.
