Senat spikeri Máýlen Áshimbaev koronavirýstan jazylyp, kúndelikti jumysyna oraldy, dep habarlaidy "Ult aqparat".
Bul jaiynda Senat tóraǵasy resmi Facebook paraqshasynda habarlady.
«Qurmetti dostar! Sońǵy tapsyrǵan eki PTR synamasynyń nátijesi oidaǵydai bolyp, indetten jazylyp shyqtym. Soǵan bailanysty eki aptaǵa jalǵasqan karantinnen keiin búgin qaitadan qalypty jumys formatyna kóshkenimdi habarlaimyn» dep jazdy Máýlen Áshimbaev.
Onyń aitýynsha, osy ýaqyttyń ishinde boiynan aýrýdyń eshqandai belgileri baiqalmaǵan.
«Sondyqtan jumysymdy toqtatpai, qashyqtan atqaryp otyrdym. Osy rette jyly lebizderińizben qoldaý kórsetip, tezirek saýyǵyp ketýime tilektestik bildirgen barshańyzǵa alǵysymdy jetkizgim keledi. Men úshin munyń mańyzy zor. Aldymyzda eldik múdde jolynda atqaratyn áli talai aýqymdy mindetter tur. Solardy iske asyrý kezinde de ózderińizben únemi bailanysty bolamyz dep senemin. Ókinishke qarai pandemiia qaýpi áli seiilgen joq. Sondyqtan saqtyq sharalaryn ustanyp, meditsina qyzmetkerleri men mamandardyń usynymdaryn barynsha oryndaýymyz kerek. Bul – ózimizben birge týǵan-týystarymyz úshin de asa mańyzdy. Barshańyzǵa zor densaýlyq tileimin! Aman bolyńyzdar» dep túiindedi sózin Senat spikeri.
