Búgin «Nur Otan» partiiasy Tóraǵasynyń Birinshi orynbasary Máýlen Áshimbaev Qazaqstandaǵy Eýropalyq Odaq Ókildiginiń basshysy Sven-Olov Karlssonmen kezdesti. Bul týraly "Ult aqparat" partiianyń baspasóz qyzmetine silteme jasap habarlaidy.
Kezdesýde taraptar eki jaqty yntymaqtastyqtyń mańyzy men aldaǵy Qazaqstan Respýblikasy Prezidentiniń sailaýyna qatysty máselelerdi talqylady.
Aldymen Máýlen Áshimbaev Qazaqstan men Eýropalyq Odaq arasyndaǵy qarym-qatynasqa nazar aýdardy. Ol sońǵy jyldarda eki eldiń yntymaqtastyǵyn arttyrý maqsatynda Qazaqstannyń Tuńǵysh Prezidenti - Elbasy Nursultan Nazarbaev pen Eýropa elderiniń basshylary tarapynan aitarlyqtai jumystar atqarylǵanyn atap ótti.
«Bizdiń taraptar 2015 jyly qol qoiylǵan Áriptestik jáne yntymaqtastyq týraly kelisimniń negizinde ózara bailanysty odan ári kúsheitti. Búginde eki jaqty ekonomikalyq bailanysymyz júieli túrde damyp keledi. Kóptegen eýropalyq kompaniialar Qazaqstanda tabysty jumys istep jatyr. Qazaqstan ekonomikasyndaǵy syrtqy saýda ainalymynyń 50 paiyzy Eýropalyq Odaq elderine tiesili. Sol sebepti Eýropalyq Odaqty elimizdiń eń basty saýda-ekonomikalyq seriktesi dep ataýǵa tolyq negiz bar», - dedi Máýlen Áshimbaev.
Sonymen qatar kezdesýde Qazaqstan ekonomikasyndaǵy shetel investitsiiasynyń jartysynan astamy Eýropalyq Odaq elderiniń úlesinde ekeni aityldy. «Nur Otan» partiiasy Tóraǵasynyń Birinshi orynbasary saýda jáne investitsiialyq qarym-qatynastaǵy bul deńgeiler shektik kórsetkish emes ekenine nazar aýdaryp, aldaǵy ýaqytta budan da joǵary nátijeler bolatynyna senetinin jetkizdi.
Sondai-aq ol taraptardyń saiasi jáne partiiaaralyq bailanysyna da toqtaldy.
«Qazaqstan men Eýropalyq Odaqtyń saiasi bailanysy qarqyndy damyp keledi. Bizdiń partiiaaralyq qarym-qatynasymyz da aitarlyqtai deńgeide. Germaniianyń jáne basqada eýropalyq elderdiń jetekshi partiialarymen júieli bailanys ornattyq. Aldaǵy ýaqytta osy baǵyttaǵy jumysymyzdyń aiasyn odan ári keńeitýge múddelimiz», - degen Máýlen Áshimbaev «Nur Otan»-nyń Qazaqstandaǵy jetekshi saiasi kúsh sanalatynyn jáne basty maqsat osy kóshbasshylyqty saqtap qalý ekenin aitty.
Budan basqa, is-shara barysynda Elbasy Nursultan Nazarbaevtyń óziniń Qazaqstan Prezidenti retindegi ókilettigin toqtatý týraly tarihi sheshimi jáne onyń 30 jylǵa jýyq el basqaryp, táýelsiz, zamanaýi, naryqtyq, demokratiialyq, quqyqtyq Qazaqstandy qalyptastyrǵany sóz boldy.
«Elimizdiń ekonomidaǵy, saiasattaǵy, áleýmettik saladaǵy barlyq jetistikteri Nursultan Nazarbaevtyń esimimen bailanysty. Ol Qazaqstan Prezidentigi retindegi ókilettigin toqtatqanymen «Nur Otan» partiiasynyń Tóraǵasy, Qazaqstan Respýblikasy Qaýipsizdik Keńesiniń Tóraǵasy, Qazaqstan halqy Assambleiasynyń Tóraǵasy, Elbasy bolyp qala beredi», - dedi Máýlen Áshimbaev.
Odan bólek, partiia Tóraǵasynyń Birinshi orynbasary qazirgi tańda Qazaqstan halqynyń tarihi kezeńdi bastan ótkerip jatqanyna jáne alda úlken saiasi naýqan turǵanyna nazar aýdardy.
«Partiiamyzdyń 23 sáýirdegi XIX sezinde Elbasy Qazaqstan Prezidenttigine kandidat retinde Qasym-Jomart Kemelulyn usyndy. Ony barsha sezd delegattary biraýyzdan qoldady. Soǵan bailanysty qazirgi tańda kandidatymyzdyń úgit-nasihat jumystaryna qyzý daiyndyq júrgizilip jatyr. Respýblikalyq jáne aimaqtyq deńgeidegi qoǵamdyq shtabtar quryldy. Barlyq qajetti sharalar qolǵa alyndy», - dedi Máýlen Áshimbaev.
Kezdesýde sailaýdyń ashyq ári ádil ótý máselesi de áńgimege arqaý boldy. Osy máselege toqtalǵan «Nur Otan» partiiasy Tóraǵasynyń Birinshi orynbasary partiianyń tek zań sheńberinde ǵana áreket etetinin airyqsha atap ótti.
«Sailaýdyń ashyq ári ádil, elimizdiń zańdary men halyqaralyq normalarǵa sáikes ótetinine senimdimin. Memleket basshysy Qasym-Jomart Toqaev ta osy salaǵa asa mańyz berip, tiisti memlekettik organdarǵa tapsyrma berdi. Óitkeni bul sailaý - bilik sabaqtastyǵyn qamtamasyz etip, demokratiialyq damýǵa yqpal etetin el damýyndaǵy mańyzdy kezeń. Sondyqtan bizdiń partiia zań aiasynda áreket etedi. Bul iste biz otandyq jáne halyqaralyq baqylaýshylarmen, Eýropadaǵy qaýipsizdik jáne yntymaqtastyq uiymy siiaqty iri qurylymdarmen tyǵyz jumys isteýge daiynbyz», - dedi Máýlen Áshimbaev.
Sonymen birge partiia Tóraǵasynyń Birinshi orynbasary kandidat Qasym-Jomart Toqaevtyń sailaýdaǵy basty qaǵidasy Elbasy saiasatynyń sabaqtastyǵyn saqtaý ekenin aitty. Onyń sózine qaraǵanda, bul ekonomikada, áleýmettik saiasatta, saiasi júiede esh nárse ózgermeidi degendi bildirmeidi.
«Sabaqtastyq Elbasy saiasatynyń negizgi basymdyqtaryn saqtap qalýmen erekshelenedi. Olar kópvektorly syrtqy saiasat pen beibitsúigishtik qaǵidalary. Ekonomikadaǵy sabaqtastyq naryqtyq ekonomika, áleýmettik az qamtylǵan toptarǵa qoldaý kórsetý jáne sheteldik investitsiialardy jumyldyrý qaǵidalaryna taban tireidi. Al saiasatta burynǵydai turaqtylyq pen demokratiialyq damý qaǵidasyna basymdyq beriledi. Al jumys barysynda jańa, tyń bastamalardyń qolǵa alynatyny sózsiz», - dedi «Nur Otan» partiiasy Tóraǵasynyń Birinshi orynbasary.
Sondai-aq Máýlen Áshimbaev óz sózinde úgit-nasihat jumystary negizinen úsh baǵyt boiynsha júrgiziletinin de tilge tiek etti.
«Eń aldymen dástúrli buqaralyq aqparat quraldaryna basymdyq beriledi. Ekinshiden, elimizdiń barlyq óńirindegi halyqpen tikelei kezdesip, kandidattyń sailaýaldy baǵdarlamasyn túsindiremiz. Sondai-aq naýqan kezinde áleýmettik jelilerdi de keńinen paidalanamyz. Bul jumystardyń barlyǵy zań sheńberinde júrgiziledi», - degen Máýlen Áshimbaev sailaýdan keiin de Qazaqstan men Eýropalyq Odaq elderiniń bailanysy odan ári jalǵasatynyna senim bildirdi.
Óz kezeginde Sven-Olov Karlsson Qazaqstandaǵy qazirgi saiasi oqiǵalar halyqaralyq normalar men eldiń Konstitýtsiiasyna sáikes órbip jatqanyn aitty. Ol eki taraptyń qarym-qatynasyn odan ári damytý, investitsiia tartý salasyn jetildirý jáne 2015 jylǵy Áriptestik jáne yntymaqtastyq týraly kelisimde kórsetilgen basymdyqtardy júzege asyrý jumystaryn jalǵastyrý jaiyna da toqtaldy. Odan bólek, eýropalyq ókil Elbasymyzdyń álemdik deńgeidegi eńbegine nazar aýdardy.
- Qazaqstannyń Tuńǵysh Prezidenti Nursultan Nazarbaevtyń ótken jyldyń qazan aiyndaǵy Briýsselge jasaǵan saparyn, sol kezdegi ASEM sammitindegi sóilegen sózin biz joǵary baǵalaimyz. Atalǵan jiynda Nursultan Ábishuly mazmundy sóz sóilep, Eýropa men Aziia elderiniń ózara bailanysyn nyǵaitý máselesine kóńil bóldi. Taiaýda ǵana Beijińde ótken «Bir jol, bir beldeý» forýmynda da Nursultan Nazarbaev jahandyq dialogty damytý máselesin kóterdi. Bul Qazaqstannyń álemdik qaýymdastyqta úlken abyroiǵa ie ekenin kórsetedi, - dedi Qazaqstandaǵy Eýropalyq Odaq Ókildiginiń basshysy.
Sondai-aq ol Ortalyq Aziiadaǵy turaqtylyq pen qaýipsizdik jaiyna kóńil bólip, bul iste Qazaqstannyń aimaq kóshbasshysy retinde mańyzdy ról atqaratynyn aitty.
- Biz sizdiń eldiń kórshiles memlekettermen jaqsy qarym-qatynas ornatqanyn da erekshe qurmetteimiz. Aimaqtyq bailanys ekonomikalyq damýǵa tyń serpin beredi jáne saiasi turaqtylyq pen qaýipsizdikti qamtamasyz etedi. Eýropalyq Odaq osy salada da birlesip jumys isteýde daiyn. Sebebi Eýropalyq Odaq Ortalyq Aziianyń qaýipsizdigi men turaqtylyǵyn qamtamasyz etýge múddeli, - dedi Sven-Olov Karlsson.
Aita keteiik, Eýropalyq Odaq Qazaqstannyń eń negizgi saiasi jáne ekonomikalyq áriptesteriniń biri. Eki tarap arasyndaǵy diplomatiialyq qarym-qatynastar alǵash ret 1993 jylǵy 2 aqpanda ornatyldy. Sodan beri ózara bailanys qarqyndy damyp keledi.
