Osy kúni ultymyzdyń bolashaǵy úshin bas kótergender men kúshtep ujymdastyrýdyń saldarynan zardap shekkenderdiń rýhtaryna taǵzym etý – bizdiń perzenttik boryshymyz. Senat tóraǵasy Máýlen Áshimbaev Facebook-tegi paraqshasynda osylai málim etti, dep habarlaidy "Ult aqparat".
«Búgin – tarihymyzdaǵy eń qasiretti kezeńderdiń biri Saiasi qýǵyn-súrgin jáne asharshylyq qurbandaryn eske alý kúni. Osy kúni ultymyzdyń bolashaǵy úshin bas kótergender men kúshtep ujymdastyrýdyń saldarynan zardap shekkenderdiń rýhtaryna taǵzym etý – bizdiń perzenttik boryshymyz.
Sol bir zobalań jyldar qazaqtyń ósip-órkendeýine óte aýyr soqqy bolyp tidi. Eldiń erteńine alańdaǵan ziialylarymyz ben qairatkerlerimiz qýǵyn-súrginge ushyrap, jazyqsyz japa shekti. Erkindikke umtylǵan Alash arystary da totalitarlyq júieniń qursaýynan qutyla almady», - dep jazdy Máýlen Áshimbaev.
Onyń pikirinshe, ǵasyrlar boiy qalyptasqan dástúrli turmysymyz esh negizsiz ózgertilip, ultymyz alapat náýbetti bastan ótkergen.
«Ashtyqtyń saldarynan halqymyzdyń jartysyna jýyǵynan aiyryldyq. Taǵy kóp bóligi týǵan jerin tastap ketýge májbúr boldy.
Biz tarihymyzǵa tańba bolyp basylǵan mundai qaiǵyly kezeńderdi eshqashan umytpaýymyz kerek. Bul baǵytta Elbasymyz Nursultan Ábishuly Nazarbaevtyń saiasaty aiasynda kóptegen bastama iske asyryldy. Arnaiy eske alý kúni belgilenip, monýmentter ashyldy. Qazaq halqyna alǵys aitý kúni de osy «tar jol, taiǵaq keshýlermen» tikelei bailanysty ekeni anyq.
Qazirgi tańda Memleket basshysy Qasym-Jomart Kemeluly Toqaevtyń bastamasymen saiasi qýǵyn-súrgin qurbandaryn tolyq aqtaý jumystary qolǵa alyndy. Sondai-aq, Prezidentimiz asharshylyq taqyrybyn keńinen zertteýdi tapsyrdy. Sonyń aiasynda júrgizilgen alǵashqy zertteýler óz nátijesin bere bastaǵanyn bilemiz», dep jazdy Senat spikeri.
Máýlen Áshimbaev aldaǵy ýaqytta ulttyq sanamyzdy jańǵyrtyp, tarihymyzdy tanýǵa jol ashatyn osyndai jumystar jalǵasa beredi degen oi aitty.
«Búgingi eske alý kúninde ult muraty jolynda ómirin qiǵan jáne asharshylyqtyń qurbany bolǵan jandardyń jatqan jerleri jaryq bolsyn dep tileimiz. Endi eshqashan mundai qaiǵyly oqiǵalar qaitalanbasyn. Táýelsiz Qazaq eli máńgi jasai bersin!», - dedi ol.
