Búgin Qazaqstan Respýblikasynyń Parlamentine 25 jyl toldy. Bul týraly QR Parlamenti Senatynyń tóraǵasy Máýlen Áshimbaev Facebook-tegi paraqshasynda jazdy, dep habarlaidy "Ult aqparat".
«Búgin Qazaqstan Respýblikasynyń Parlamentine 25 jyl tolyp otyr. Osydan týra shirek ǵasyr buryn qos palataly Parlamentimizdiń alǵashqy sessiiasy ashylǵan edi. Sodan beri zań shyǵarý organy ózine júktelgen mindetti abyroimen atqaryp keledi. Osy jyldar ishinde elimizde Elbasymyz Nursultan Ábishuly Nazarbaevtyń bastamasymen birqatar saiasi, ekonomikalyq jáne áleýmettik reformalar tabysty iske asyryldy. Kóptegen tyń baǵdarlamalar men jobalar qolǵa alyndy. Sonyń bárinde Parlament erekshe ról atqardy. Sebebi, Parlament sapaly zańdar arqyly ulttyq múdde jolynda atqarylǵan ár jumystyń quqyqtyq negizin qalyptastyryp otyrdy. Qazirgi kezeńde Memleket basshysy Qasym-Jomart Kemeluly Toqaevtyń keshendi jańǵyrý baǵdarlamasyn sátti júzege asyrýdy zańnamalyq turǵydan qamtamasyz etý – Parlamenttiń basty mindeti», - dedi Senat spikeri.
Máýlen Áshimbaevtyń atap ótýinshe, shirek ǵasyrda Parlament Otanymyzdyń ósip-órkendeýine yqpal etetin 2 940 zań qabyldaǵan eken. Onyń 200-den astamyna depýtattar bastamashy boldy. Halyq qalaýlylary tek zań shyǵaryp qana qoimai, depýtattyq saýaldar arqyly da qoǵamdy alańdatqan kóptegen máseleniń oń sheshilýine atsalysyp keledi. Máselen, 25 jylda tek senatorlardyń ózderi 2 140 saýal joldap, halyqtyń únin bilikke jetkize bildi.
«Sońǵy konstitýtsiialyq reformanyń nátijesinde elimizde Parlamenttiń ókilettigi kúsheitilgeni belgili. Sol arqyly zań shyǵarý qyzmetine tyń serpin berildi. Prezidentimizdiń bastamasymen Parlamenttik oppozitsiia institýtynyń zańmen bekitilýi de ókildi organnyń bedelin ósirgen mańyzdy qadam boldy. Sondai-aq, halyqaralyq yntymaqtastyqty nyǵaitý máselesinde Parlamenttiń alar orny bólek. Búginde barlyq seriktes memleketterdiń Parlamentterimen tyǵyz bailanys ornady. Parlamentaralyq uiymdarmen de qarym-qatynas júieli jolǵa qoiyldy, - dedi ol.
Onyń paiymynsha, qazirgi tańda qos palataly Parlament tolyq qalyptasyp jáne ózin biliktiń negizgi tarmaqtarynyń biri ekenin is júzinde naqty dáleldep úlgerdi.
«Shyn máninde, zań qabyldaý barysynda Májilistiń de, Senattyń da mańyzy zor. Bul jerde, eń aldymen, tutas eldiń jáne ár óńir men ár azamattyń múddesi erekshe nazarǵa alynady. Sol sebepti, zań jobalaryn qaraý kezinde osy máselelerge basa mán beriledi. Parlamentte Palata otyrystarynan bólek, ózekti taqyryptarǵa arnalǵan parlamenttik tyńdaýlar, Úkimet saǵattary, kóshpeli otyrystar, dóńgelek ústelder, komitetterdiń otyrystary jáne taǵy da basqa is-sharalar jumystyń negizgi baǵyttary bolyp sanalady. Áriptesterimdi Parlamenttiń 25 jyldyǵymen quttyqtai otyryp, zań shyǵarý biligin júzege asyratyn eń joǵary ókildi organ aldaǵy ýaqytta da táýelsiz Qazaqstannyń odan ári damýy úshin nátijeli qyzmet ete beredi dep senemin», - dedi Máýlen Áshimbaev.
.jpeg)