«Asharshylyq» tarihi dramasyn túsirýge qazaqstandyqtardan 38 mln teńge qarajat qajet. Bul týraly búgin film túsirýshilermen ótken baspasóz máslihatynda «Start taim» kraýdfanding platformasynyń jobalar boiynsha direktory Áziza Ótegenova aitty, dep habarlaidy QazAqparat tilshisi.
Búgin Almaty qalasynda «MG production» kinokompaniiasy «Start taim» kraýdfanding platformasymen birlese otyryp «Asharshylyq» tarihi dramasyn túsirý jumystaryn bastaitynyn málim etti. Film 1931-1933 jyldar aralyǵynda qazaq halqynyń basynan ótken asharshylyq taqyrybyna arnalmaq.
«Bul filmdi túsirýge 1 mln AQSh dollary kóleminde qarajat qajet. Ol qarajattyń jartysyn eýropalyq kino qory bergeli otyr. «MG production» kinokompaniiasy da óz kúshin, tehnikalyq múmkindigin beredi. Al, halyqtan, kraýdfanding arqyly qajet somanyń 10 paiyzyn ǵana jinamaqpyz. Naqtyraq aitqanda, biz halyqtan 38 mln teńge jinaýymyz qajet. Qarjy jinaý aktsiiasy 31 jeltoqsanǵa deiin jalǵasady. 38 myń qazaqstandyq 1 000 teńgeden kómektesse, sol qarjyny jinai alamyz. Bul - úlken asar. Tarihymyz úshin barlyǵymyz birigip kómekteseiik. Kómektesken qazaqstandyqqa tsifrlyq formattaǵy disk beriledi», - dedi Áziza Ótegenova.
«Asharshylyq» filminiń stsenarisi Marina Kýnarovanyń aitýynsha, filmdi túsirý jumystary qarasha aiynda bastalmaq.
«Film Qazaqstan aýmaǵynda túsiriledi. Túsirilim qys mezgilinde júrýi kerek. Film 2017 jyldyń qarasha aiynda bastalyp, 2018 jyldyń aqpan aiynda aiaqtalady. 2018 jyldyń kúzinde álemdik prokatqa shyǵady. Filmniń uzaqtyǵy - 103 minýt. Eýropalyqtar stsenariimen tanysyp shyqqannan keiin birden qoldaý bildirdi», - dedi Marina Kýnareva.
Eske sala keteiik, Qazaqstanda alǵash ret kraýdfanding arqyly «Qazaq eli» tarihi kinosyna qarajat jinaý júrgizilgen bolatyn. Onda qazaqstandyqtar 1,3 mln teńge jinady.
