Joǵarǵy sotta QR Prezidenti janyndaǵy adam quqyqtary jónindegi komissiianyń keńeitilgen májilisi ótip jatyr, dep habarlaidy "Ult aqparat" Aqordaǵa silteme jasap.
QR Joǵarǵy sotynyń tóraǵasy Jaqyp Asanov búgingi tańda zaman talaby Qazaqstannyń sot júiesine qandai mindetter júktep otyrǵanyn aitty.
«Halyqaralyq mamandar Qazaqstanda sotqa júginý jeńildep, onymen qatysty shyǵyndardyń azaiǵanyn aitady. Rasymen de buryn azamattar bir is boiynsha 2 jyl júretin bolsa, qazir protsesterdiń kóbi bir jyldan aspaidy. Aryzdardyń 90 paiyzy internet arqyly túsetin boldy. «Doing Business» reitingine sensek, sot protsesterine qatysýshylarǵa jaǵdai jasaý boiynsha álemde tórtinshi orynda turmyz. Degenmen, el Prezidenti sot júiesine birqatar syn aitqan bolatyn. Sot protsesine qatysýshylarǵa jaǵdai jasaýdan buryn, sýdialarǵa degen el senimin arttyrý kerektigin tapsyrdy. Al sýdialarǵa senim qabyldaǵan sheshimderi negizdi bolǵanda ǵana qalyptasady. Taraptar úkimniń árbir ýájine jaýap tabýy kerek. Sýdia óz sheshimin jariialaǵannan keiin zańnyń qasań tilimen emes, halyqtyń tilimen túsindirip berýi kerek. Sonda ǵana joǵarǵy satylarǵa aryz jaýdyrý azaiady», - dedi Joǵarǵy sot tóraǵasy.
Sondai-aq, ol biyl jyl sońyna qarai qyzmet babyndaǵy sýdialardyń laýazymyna qanshalyqty laiyqty ekenin tekserý bastalatynyn aitty.
«Komissiianyń Joǵarǵy sotta ótýi tegin emes. Adamdardyń quqyǵyn qorǵaý - sot júiesiniń eń negizgi mindeti. Sot protsesterine qatysýshy taraptarǵa jaǵdai jasaý boiynsha kóptegen ózgerister jasalyp jatyr», - degen Joǵarǵy sottyń tóraǵasy Jaqyp Asanov búginde sot júiesine sapaly maman irikteý reformasynyń ekinshi kezeńi bastalǵanyn atady.
«Buǵan deiin qyzmetke kirisýshi sýdialardy jańa talap boiynsha qabyldadyq. Meniń jeke pikirim boiynsha, qazir sot júiesinde kareralyq ósý protsesi ádil ótip jatyr. Ony bir ǵana dúnieden baiqaýǵa bolady. Sońǵy kezde maǵan eshkim ondai máselemen ótinish aitpaityn boldy. Óitkeni, meniń qolymnan bireýdi sýdia etip taǵaiyndaý nemese qyzmette ósirý kelmeidi. Barlyǵyn arnaiy jasaqtalǵan komissiia sheshedi. Qazir kezdeisoq zańgerler úshin sot júiesine jol jabyldy dep senimmen aita alamyn. Endigi másele qyzmet babyndaǵy sýdialardyń sapasyna qatysty bolyp tur. Júiedegi sýdialardy osy jyldyń aiaǵynan bastap teksere bastaimyz. Munda da ozyq memleketterdiń tájiribesine negizdelgen ereje bekitiledi. Tekserýdiń ádil ótýin qadaǵalaityn komissiia quryldy. Onyń jumysyna men aralasa almaimyn. Basqa da áriptesterimniń aralaspaýyn talap etemin. Osylaisha eki jyldyń ishinde júiedegi sýdialardyń qyzmetine tolyq baǵa beriletin bolady», - dedi Jaqyp Asanov.
Eske salsaq, Memleket basshysy Qasym-Jomart Toqaev Joǵarǵy sot tóraǵasy Jaqyp Asanovqa sot júiesin jetildirý jumystaryn jalǵastyrýdy tapsyrǵan bolatyn.
Aldaǵy 2,5 jyldyń ishinde sot júiesi laiyqsyz kadrlardan tolyq tazartylmaq.
