Úidegi problemasyn sotta sheshemin deýshiler kóbeiip barady. Bul týraly búgin sot tóreligin júzege asyrýdyń 2017 jylǵy qorytyndysyna arnalǵan keńeitilgen keńeste QR Joǵarǵy sotynyń tóraǵasy Jaqyp Asanov aitty, dep habarlaidy QazAqparat.
«Azamattyq ister qatty kóbeiip keledi, 5 jylda eki ese. 2013 jyly 560 myń bolsa, byltyr 900 myńǵa jetti. Almatynyń Áýezov aýdanynda bir sýdia kúnine 12 is pen materialdy qaraidy eken. 4 jylda júkteme 4 esege ósti. Sýdialar qaǵazǵa kómilýde. Adamdardy konveinerge ainaldyrsaq, sapa qaidan bolsyn. Ár is boiynsha eki tarap. Sonda qarap otyrsaq, 900 myń is bolsa, keminde 2 milliondai adam sot áýresinde júr. Oǵan sot apparatyn, prokýrorlardy, advokattardy, sarapshylardy, sot oryndaýshylaryn qosyńyz. Bul jalpy biýdjetke úlken salmaq. Al elimizdiń damýyna úlken kedergi», - dedi Jaqyp Asanov.
Onyń aitýynsha, aryzdanyp júrgender bala-shaǵa, qalshyldaǵan qart emes. Kóbisi biznes jasap, jumys oryndaryn ashyp, elge paida keltirip júrgender. Olar kásibin ysyryp qoiyp, altyn ýaqyttaryn osyndai sottasýǵa jumsaýda.
«Biri menshigin daýlaidy, ekinshisi qaryzyn talap etedi, úshinshisi eńbekaqysyn óndirgisi keledi. Úidegi problemasyn sotta sheshemin deýshiler de kóp. Aǵasy inisimen, ákesi balasymen sottasyp jatqan jaǵdai az emes. Kásipkerden «jaǵdaiyń qalai?» dep surasań «bireýmen sottasyp jatyrmyn» degendi jii estisiń. Sonda qalai? Tabiǵatynan sabyrly, janjaldy jaqtyrmaityn halqymyz daýǵa qumar bolyp ketkeni me? Basymyz pispei qalsa, dereý sotqa júgiremiz. Qit etsek sol. Ekiaradaǵy daýdy sot arenaǵa shyǵaryp, aiqai-shýmen sheshkimiz keledi. Bitimge kelý, tatýlasý, kelisý mádenietimiz qaida joǵalyp ketti?», - dedi Joǵarǵy sot tóraǵasy.
Sonymen qatar sotqa aryz bermei jatyp, tanys izdei bastaityndyǵymyzdy da synady.
«Sotta aǵam bar, kókem bar dep qorqytamyz. Sondaǵy maqsat - ádildik emes. Opponentten ósh alý, abroiyn airandai tógý. Sondyqtan Elbasymyz damýymyzǵa kedergi bolatyn osyndai ádetterden arylýymyz qajet dep shegelep aitty. Rýhani jańǵyramyz desek, sonyń negizigi bir sharty - osy», - dedi ol.
