Almatyda Memlekettik hatshy Qyrymbek Kósherbaev mádeniet jáne óner qairatkerlerine QR Tuńǵysh Prezidentiniń mádeniet salasyndaǵy memlekettik stipendiiasyn tapsyrdy, dep habarlaidy QazAqparat.
75 ádebiet pen óner qairatkerine memlekettik stipendiia taǵaiyndaldy . Olardyń arasynda Asanáli Áshimov, Sábit Dosanov, Nurǵali Núsipjanov, Dýlat Isabekov jáne basqa da óner maitalmandary bar.
Belgili jazýshy, Qazaqstan Respýblikasyna eńbek sińirgen qairatker Sábit Dosanovtyń aitýynsha, Tuńǵysh Prezident stipendiiasyn jylda alady.
«Bul stipendiiany alyp júrgenime 15 jyldan asty. Atalǵan marapat shyǵarmashylyq adamdaryna kerek dep oilaimyn. Moraldik jaǵynan bolsyn, materialdyq jaǵynan bolsyn. Adamǵa jańa shyǵarma jazýǵa shabyt beredi. Til men mádenietke memleket úlken kóńil bólip jatyr. Memleket basshysy men Elbasyna alǵysym sheksiz», - deidi qalamger.
Qazaqstannyń halyq ártisi, Memlekettik syilyqtyń laýreaty Asanáli Áshimov te - osy stipendiianyń turaqty iegeri.
«Osy stependiia paida bolǵaly alyp jatyrmyn. Óner adamdaryna kóńil bólip otyrǵan Prezident Qasym-Jomart Toqaevqa rahmet. Pandemiiaǵa qaramastan elde kóp sharýa atqaryldy. Abaidyń 175 jyldyǵy halyqaralyq deńgeide, joǵary dárejede atalyp ótti. Alash azamattaryn ulyqtap jatyrmyz, bul jaqsy. Ótkendi umytýǵa bolmaidy. Ótkensiz keleshek joq. Árqashanda jaqsylyqqa umtylý kerek. Elimizde qýanysh pen toi kóp bolsyn»,-deidi Asanáli Áshimov.
Aita ketý kerek, stipendiialar jyl saiyn Qazaqstannyń mádenietiniń qurylýyna, saqtalýyna jáne damýyna qosqan úlesi úshin qurmetti ataqtar men memlekettik nagradalarmen marapattalǵan shyǵarmashylyq qyzmetkerleri men mádeniet qyzmetkerlerin memlekettik qoldaý maqsatynda beriledi.
Buǵan deiin QR Memlekettik hatshysy Qyrymbek Kósherbaev Qazaqstannyń halyq artisi, Memlekettik syilyqtyń laýreaty, M.Áýezov atyndaǵy Qazaq ulttyq akademiialyq drama teatrynyń akteri Sábit Orazbaevqa I dárejeli «Barys» ordenin saltanatty túrde tabys etken bolatyn.
