Oqytýshy mamandyǵymen kózge túsken Asan Joldasov «Qazaqstannyń 100 jańa esimi» jobasynda jeńimpaz ataný qoǵam aldynda úlken jaýapkershilikti júkteitinin aitty, dep habarlaidy QazAqparat.
«Bul joba biregei ári qyzyqty dep sanaimyn. Jeńimpaz atanǵannan keiin meniń ómirimde eleýli ózgerister boldy. Meniń oiymsha, bul qyzyqty joba aiasynda kóptegen daryndy adamdardy tabýǵa múmkindik bar. Negizgi, joba aiasynda qoǵam aldyndaǵy ózińniń jaýapkershiligińdi sezinesiń. Sonymen qatar, óziniń qoǵamǵa qanshalyqty qomaqty paida keltire alatynyńdy basqa da jas ustazdarǵa kórsete alasyń», - dedi A. Joldasov.
Osy oraida ol Jastar jyly kezinde muǵalimderge erekshe nazar aýdarylyp otyrǵanyn, bul turǵyda pedagogtarǵa qatysty eleýli ózgerister jasalyp jatqanyn atap ótti.
«Jobada jeńimpaz ataný - biz úshin úlken mártebe ári jaýapkershilik», - dedi ol.
Onyń sózine qaraǵanda, «100 jańa esim» jobasynda iriktelgen azamattarmen tájiribe almasý nátijesinde birlesken jobalardy iske asyrý múmkindigi bar.
«Jeke ózime qatysty aitatyn bolsam, kóptegen ózgerister boldy. Birinshi kezekte, Qazaqstan ustazdarynyń qoǵamdastyǵy úshin úlken jaýapkershilikti sezinip otyrmyn. Ózderińiz bilesizder, Qazaqstandaǵy muǵalimder arasynda názik jandardyń úlesi basym. Osy oraida mektepte er azamattar da kóbirek bolǵany durys. Jalpy, bilim salasyna ońtaily ózgerister engizýge nietti jastar sanynyń arta túsýine yqpal ete alatynymyzǵa úmittimin», - dedi,
Aita keteiik, «Qoǵam» baǵytynda matematik, baǵdarlamashy jáne oqytýshy Asan Joldasov 15 757 daýyspen jeńimpaz atandy. Asan Joldasov oqýshy kezinen-aq matematikadan respýblikalyq, halyqaralyq olimpiadalarǵa qatysqan jáne 19 jasynda óz mektebin ashqan. Oqytýdyń arnaiy ádistemesin jasap, «Pifagor» mektebin úlken kompaniiaǵa ainaldyrǵan. Osylaisha, 10 jylda 10 myńnan astam balanyń matematikaǵa qyzyǵýshylyǵyn oiatqan.
Budan buryn habarlanǵandai, 2019 jyldyń 1 qazanynan bastap 100janaesim.ruh.kz saitynda «Qazaqstannyń 2019 jylǵy 100 jańa esimi: jas qazaqstandyqtardyń tabys tarihy» jobasyna ótinimder qabyldaý bastalady.
.jpeg)