Ánshi ári telejúrgizýshi Asha Matai Ulttyq quryltai depýtattyǵyna kandidat retinde tirkelýine qatysty qoǵamda týyndaǵan qyzý pikirtalastardan keiin alǵash ret málimdeme jasady, dep habarlaidy ult.kz.
Óner iesi áleýmettik jelidegi paraqshasynda osy ýaqytqa deiin ne sebepti únsiz bolǵanyn túsindirip, buǵan sailaý týraly zań talaptary sebep bolǵanyn aitty.
«Kópshilik meniń osy ýaqytqa deiin nege ashyq sóilemegenimdi túsinbegen bolar. Sebebi zań bárine birdei. Kandidattar tirkelip jatqan kezeńde sailaýaldy úgit-nasihat júrgizýge bolmaidy», – dep jazdy Asha Matai.
Onyń aitýynsha, 2026 jylǵy 23 shilde saǵat 18:00-ge deiin kandidattardy qoldaýǵa nemese qoldamaýǵa shaqyrýǵa, óz kandidatýrasyn nasihattaityn materialdar jariialaýǵa jáne sailaýshylardy belgili bir tańdaý jasaýǵa úgitteýge zańmen tyiym salynǵan.
Sondai-aq ol mundai talaptardy buzý zańda kózdelgen jaýapkershilikke ákelýi múmkin ekenin atap ótti. Sondyqtan zań talaptaryn qurmettep, osy ýaqytqa deiin únsizdikti tańdaǵanyn jetkizdi.
Asha Mataidyń sózinshe, 23 shilde saǵat 18:00-den bastap sailaýaldy úgit-nasihat kezeńi resmi túrde bastalǵan. Endi ol óz oiyn ashyq aityp, qoǵamdaǵy ózekti máselelerge qatysty ustanymyn erkin jetkize alatynyn málimdedi.
Eske salaiyq, buǵan deiin Asha Mataidyń depýtattyqqa kandidat bolýy áleýmettik jeli qoldanýshylary arasynda qyzý talqylanyp, kópshilik bul sheshimge qatysty túrli pikir bildirgen bolatyn.
Al zańger Meiirman Shekeev Asha Mataidy taǵy debatqa shaqyrdy.
