Foto: Ádilbek Ybyraiymulynyń muraǵatynan
Jýyrda Almaty qalasyndaǵy «Arna-b» baspasynan jazýshy, jýrnalist, halyqaralyq «Alash» jáne «Daraboz» ádebi syilyqtarynyń laýreaty Ádilbek Ybyraiymulynyń jańa romany – «Arzý» jaryq kórdi, dep habarlaidy Ult.kz.
Týyndyda qazaq eliniń qazirgi jaǵdaiy, ǵaryshty igerý, jerimizdegi sirek metall men deiterii sýy, oǵan qyzyǵýshylyq tanytqan alpaýyt derjavalardyń astamshyl piǵyly, dini nanym-senimderdiń beleń alýy sekildi ózekti máseleler kórkem tilmen órbitiledi.
«Arzý» – parsy tilinen engen sóz. Maǵynasy – arman-tilek, qalaý-niet, qushtarlyq. Sonymen qatar bul sóz adamnyń jan dúniesindegi tereń ańsar men saǵynyshty da meńzeitin poetikalyq mánge ie.
Foto: Ádilbek Ybyraiymulynyń muraǵatynan
«Sońǵy jyldardaǵy izdenisterimniń nátijesi retinde osy roman dúniege keldi. Onda qazirgi zamandaǵy jahandyq máselelerdi biolog-jas ǵalymnyń kózimen kórsetýge tyrystym. Ǵylym men tehnika, rýhaniiat pen senim, saiasat pen ústemdik sekildi qabattardy biriktirip, oily oqyrmanǵa oi tastaý maqsatynda jazdym», – deidi avtor Ádilbek Ybyraiymuly.
Romannyń alǵysózin tehnika ǵylymdarynyń doktory, professor, Ulttyq ǵylym akademiiasynyń akademigi, ál-Farabi atyndaǵy Memlekettik syilyqtyń iegeri Meiirbek Moldabekov jazǵan. Ol óz sózinde:
Foto: zhasalash.kz. Meiirbek Moldabekov.
– «Arzý» – tereń filosofiialyq jáne kórkemdik mazmunǵa qurylǵan, adamzattyń aqyl, parasat, izgilik jolyndaǵy máńgilik izdenisterin sýretteitin shyǵarma. Taqyryptyń ózektiligi men kórkemdik deńgeii erekshe», – dep baǵalaidy.
Romandaǵy negizgi keiipkerler – astronomiia, fizika, teologiia, gidrogeologiia salalaryndaǵy zamanaýi ǵylym ieleri. Olardyń beinesi arqyly ar men aqyl, tanym men taǵdyr, minez ben bolmys arasyndaǵy kúrdeli bailanystar ashylady.
On taraýdan turatyn roman 27,5 baspa tabaq kóleminde jaryq kórgen. Ǵylymi-fantastikalyq sipattaǵy shyǵarmada:
astronomiia men galaktikadaǵy sáýleler men magnit óristerin energiiaǵa ainaldyrý;
deiterii sýynan jańa qarý jasaý;
osmii keniniń Mars ekspeditsiialaryndaǵy mańyzy sekildi ǵylymi ideialar kórinis tapqan.
«Arzý» – bailyq pen bilikke, ústemdik pen tehnologiiaǵa umtylǵan búgingi pendeniń bet-beinesin ashýǵa talpynǵan, bolashaq urpaqqa oi salar mańyzdy shyǵarma.
Ádilbek Ybyraiymuly Alpysbai 1965 jyly 18 sáýirde Almaty oblysy, Aqsý aýdany, Qyzylaǵash aýylynda týǵan.
Qazaqstan Jastar odaǵy men Jýrnalister odaǵynyń birlesip, jýrnalistika salasyndaǵy taǵaiyndaǵan Baýbek Bulqyshev atyndaǵy syilyǵynyń iegeri (1992j.). Sondai-aq, ádebiet pen mádenietke beriletin Qazaqstan Jastar odaǵy syilyǵynyń (1997j.), Halyqaralyq «Alash» (2012j.), «Daraboz» (2015j.) ádebi syilyqtarynyń laýreaty. Qazaq handyǵynyń 550 jyldyǵyna orai ótkizilgen «Alash tarihynyń aqiqaty» atty respýblikalyq báigesiniń júldegeri, El Táýelsizdiginiń 25 jyldyǵyna arnalǵan «Azattyq aiasynda» atty respýblikalyq jyr báigesiniń birinshi oryn iegeri.
Aqbota Musabekqyzy
