Qalanyń kireberis qaqpasy Arys shaharynyń taǵy bir sáýletti týyndysyna ainaldy. Jańa nysannyń qurylys jumystaryn moinyna alyp, qarjylandyrǵan - QR Kásipodaqtar federatsiiasy, dep habarlaidy QazAqparat oblys ákiminiń baspasóz qyzmetine silteme jasap.
Ashylý saltanatyna QR Kásipodaqtar federatsiiasynyń tóraǵasy Eraly Toǵjanov pen Túrkistan oblysynyń ákimi Ómirzaq Shókeev arnaiy qatysyp, turǵyndarǵa jyly lebiz bildirdi.
«Óńirimizdegi sáýlettik jobalardyń ulttyq naqyshta bolǵany quba-qup. Qazaqylyqtyń qaimaǵy buzylmaǵan aýmaqty aishyqtaityn kórinister jańa jobalarda kórinis tapqanyna nazar aýdarý óte mańyzdy. Maýsymdaǵy qaiǵyly oqiǵadan keiin qolǵa alynǵan Arys qalasyn jaqsylyqqa bastaityn berekeli qaqpa bolady dep senemin», - dedi aimaq basshysy Ómirzaq Estaiuly.
Sonymen qatar, aimaq basshysy óz sózinde qaqpanyń qurylysyn qoldap, kómek bergen elimizdiń Kásipodaqtar federatsiiasy basshylyǵyna alǵysyn bildirdi. Kez kelgen shahardyń ózine tán qaitalanbas, airyqsha kelbeti bolady. Osyndai mazmuny men maǵynasy zor aitýly jobaǵa Qazaqstan Respýblikasy Kásipodaqtar federatsiiasy demeýshilik jasaǵan.
Arys qalasynyń kórkeiip, gúldenýine bir kisidei jumyla kirisý - búkil elge ortaq is boldy. Qalanyń bas qaqpasy - sonyń taǵy bil dáleli bolsa kerek.
Saltanatty jiynǵa «Nur Otan» partiiasy Arys qalalyq filialynyń tóraǵasy men ardagerler, qalalyq máslihat depýtattary qatysty. Ashylǵan qaqpadan alǵashqy bolyp oblys ákimi Ómirzaq Estaiuly bastaǵan top jaiaý júrip ótti.
