Foto: Tengrinews.kz
Ulttyq mýzei direktory Arystanbek Muhamediuly jansaqtaý bóliminen palataǵa aýystyryldy. Bul týraly mýzeidiń resmi ókili Aidar Qyryqbai málimdedi, - dep habarlaidy Tengrinews.kz.
"Ol shamamen, bir jarym kún jansaqtaý bóliminde jatqanyn bilesizder. Qazir ol palataǵa aýystyryldy. Jaǵdaiy ortasha. Palatasyna áli eshkimdi kirgizbeidi, tek jubaiyn. Jalpy, dárigerler ony qarap jatyr. Qazir ómirine qaýip tónip turǵan joq", - dedi Qyryqbai.
Ol Arystanbek Muhamediulyna qatysty qylmystyq is qozǵalmaǵanyn aitty.
"Sybailas jemqorlyqqa qarsy qyzmet Ulttyq mýzeidiń basshylyq quramyna qatysty qylmystyq is qozǵady. Oǵan direktordyń orynbasarlary, burynǵy direktorlar jáne t.b. kiredi. "Altyn adamnyń" álem mýzeilerine sherýi" 2017 jyly bastaldy. Osy ýaqyt ishinde birneshe direktor men orynbasar aýysty. Tekseris bolǵanyn jasyrmaimyz. Tekseriske Tuńǵyshbai Jamanqulovtyń shaǵymy (qazaqstandyq akter. - esk.) negiz bolǵan. Ol Memleket basshysynyń atyna hat jazdy. Osydan keiin bizde Esep komitetiniń tekserisi boldy. Olar usaq zańbuzýshylyqtar tapty, olardyń eskertýlerin Ulttyq mýzei oryndady. Keiin Bas prokýratýraǵa qarjylyq aýdit shaǵymy boiynsha tekseris júrgizildi. Onda da usaq eskertýler aitylyp, olar túzeldi. Jamanqulov úshinshi ret hat jazdy. Onda Muhamediulynyń ózin aiyptaǵan", - dep túsindirdi Aidar Qyryqbai.
