Shymkenttegi birinshi qalalyq aýrýhanaǵa Arystaǵy jarylystan zardap shekkender jetkizile bastady.
Arys qalasyndaǵy jarylystan 11 adam zardap shegip, Shymkenttegi aýrýhanaǵa tústi. Bul týraly qalalyq qoǵamdyq densaýlyq saqtaý basqarmasy habarlady.
«Qalalyq klinikalyq aýrýhanaǵa 11 adam túsken. Onyń 6-ýy túrli dene jaraqatyn alǵan, qalǵandaryn dárigerler tekserip jatyr. Olardyń arasynda analar men balalar bar. Basqa málimetter qosymsha habarlanatyn bolady», - deidi qalalyq Qoǵamdyq densaýlyq saqtaý basqarmasynyń baspasóz qyzmetiniń jetekshisi Laýra Mamyrova.
Al, aýrýhananyń bas dárigeri Abylai Donbai qazir úsh adamnyń aýyr hálde jatqanyn habarlady.
"Zardap shekkender jetkizile bastady, olardy qabyldap, qajetti kómektiń bárin kórsetip jatyrmyz", - dedi Donbai.
Sondai-aq, «Arys qalasyndaǵy apat aýmaǵynan 34 adam jedel járdemmen tasymaldanǵan. Olar aýrýhanaǵa jatqan joq. Qaýipsiz aýmaqtarǵa jetkizildi», - delingen Qoǵamdyq densaýlyq saqtaý depertamenti taratqan habarlamada.
Aita ketsek, Arystaǵy tótenshe jaǵdailarǵa bailanysty Ordabasy aýdanynda dárigerlik shtab qurylǵan. Ony Túrkistan oblysynyń densaýlyq saqtaý basqarmasynyń bastyǵy Muqan Egizbaev basqarady.
Jedel jumystar júrgizilýde. Patsientterge arnalǵan 200-den astam tósek ortalyq aimaqtyq aýrýhana men oblystyq klinikalyq aýrýhanada daiyndaldy. Arysqa 30 jedel járdem jiberildi. Qajet bolǵan jaǵdaida birneshe aýdandardan qosymsha jedel járdem kólikteri daiyndalady.
