Arys qalasyndaǵy joiqyn jarylystan keiin oqiǵa ornyna QR IIM tótenshe jaǵdailar komitetiniń tóraǵasy general-maior Vladimir Bekker attandy. Bul týraly vedomstvonyń baspasóz qyzmeti habarlady.
«Arys ákiminiń ókimimen qala halqy 50 shaqyrym jerde ornalasqan Munaitas aýyldyq okrýgine kóshirilip jatyr, ol úshin 20 avtobýs bólingen. Sondai-aq turǵyndardy evakýatsiialaý úshin Shymkent qalasynyń ákimdigi 36 avtobýs jiberdi» delingen habarlamada.
Baspasóz qyzmetiniń habarlaýynsha, Shymkent qalasynda 15 evakýatsiia beketi qurylǵan. Qazir Arystan jetkizilgen 17 bala Samal-3 shaǵyn aýdanynda ornalasqan Nazarbekov atyndaǵy №87 mektepke ornalastyryldy.
Resmi málimetke súiensek, órtti sóndirýge Túrkistan oblysy tótenshe jaǵdailar departamentiniń jeke quramynan 75 órt sóndirýshi men 16 tehnika jumyldyrylǵan. Qosymsha kúsh retinde Shymkent qalasynyń tótenshe jaǵdailar departamentinen 118 adam men 7 tehnika jiberildi. Tótenshe oqiǵa ornynda QR IIM bólimderinen barlyǵy 463 adam men 53 tehnika jumys istep jatyr, onyń ishinde azamattyq qorǵanys organdarynan - 193 qyzmetker men 23 tehnika, politsiia bólimshelerinen - 270 qyzmetker men 30 tehnika.
