Arystaǵy jarylysqa bailanysty Bógen sý qoimasyna eshqandai da qaýip tónip turǵan joq. Bul týraly Túrkistan oblysy aýyl sharýashylyǵy basqarmasynyń basshysy Nurbek Badraqov málim etti. Onyń video-málimdemesin oblys ákiminiń keńesshisi Sáken Qalqamanov áleýmettik jelide jariialaǵan bolatyn.
Basqarma basshysy videojazbasy arqyly Arys qalasyndaǵy tótenshe jaǵdaiǵa bailanysty Bógen sý qoimasyna qatysty taraǵan qaýesetti joqqa shyǵarady. «Arys arnasynan sekýndyna 47 tekshe metr sý sharýalardy aǵynsýmen qamtamasyz etýge bosatylyp jatyr. Bógen sý qoimasyna bailanysty eshqandai da qaýip joq. Osynda Túrkistan oblysy «Nur Otan» partiiasy filialy tóraǵasynyń birinshi orynbasary Nurmahan Joldasov pen Otyrar aýdandyq Tótenshe jaǵdailar basqarmasynyń mamandary tolyǵymen Bógen sý qoimasyn kórip shyqty. Bógen sý qoimasyna qatysty eshqandai da qaýip tónip turǵan joq», dedi N. Badraqov.
Aita keteiik, búgin tańerteń Túrkistan oblysynyń Arys qalasyndaǵy áskeri bólim qoimasynda jarylys boldy. Birneshe óńirdiń Tótenshe jaǵdailar departamenti shuǵyl jeliler qurdy. Kóp uzamai oblys basshysy Ómirzaq Shókeev bastaǵan arnaiy komissiia Arystaǵy áskeri bólimge attandy. Jaǵdaidyń aýqymymen tanysqan óńir ákimi Arys turǵyndaryn evakýatsiialaý týraly sheshim qabyldanǵanyn málim etti. QR IIM Tótenshe jaǵdailar komiteti turǵyndar qaida jáne qalai evakýatsiialanyp jatqanyn habarlady.
QR Prezidenti Qasym-Jomart Toqaev tiisti organdarǵa Arystaǵy tótenshe jaǵdaidyń zardaptaryn joiý týraly tapsyrma berdi.
Keiin habarlanǵandai, oqiǵa ornyna Qorǵanys ministri Nurlan Ermekbaev ushyp shyqty.
Sońǵy málimetter boiynsha, oqiǵa saldarynan 46 adam zardap shekti.
