Belgili kásipker, BI Group qurylys kompaniiasynyń basshysy Aidyn Rahymbaev Arystaǵy jarylystan zardap shekken turǵyndardyń úilerin jóndep berýge qomaqty qarjy bóldi, – dep habarlaidy UltAqparat.
Bul týraly kásipkerdiń ózi Feisbýk paraqshasynda jazdy.
«Bizdiń kompaniianyń qyzmetkerleri de sol jerde, Arys turǵyndaryna kómektesip jatyr. Bizdiń komanda Túrkistan jáne Shymkentten qurlysqa qajetti materialdarmen shyǵýǵa daiyn. 100 mln teńge bóldik. Bul qarjy kemi 100 úidi jóndeýge jetip qalar dep oilaimyn. Eger qajet bolyp jatsa, ústinen taǵy qosamyz. Jerlester ózderińizge bekem bolyńyzdar, bári jaqsy bolady. Biz sizdermen birgemiz» degen ol jazbasynda.
Sondai-aq, Aidyn Rahymbaev atalǵan jazbasynda áskerilerdiń qalaǵa kirýge ruqsat bergenin kútip otyrǵanyn, ruqsat alsa birden úilerdi jóndeýge kirisetinderin habarlady.
