Densaýlyq saqtaý ministri Eljan Birtanov Arysta zardap shekkenderge qatysty sońǵy málimetti jariialady, dep habarlaidy Sputnik Qazaqstan tilshisi.
"Barlyǵy 165 adam meditsinalyq kómekke júgingen. Olardyń ishinde 76 adamǵa ambýlatoriialyq kómek kórsetildi. 89 patsient statsionarlyq emge jatqyzyldy. Jansaqtaý bólimderinde 15 naýqas "politravma" diagnozymen em qabyldaýda", - dedi Birtanov úkimettiń búgingi otyrysynda.
Ministrdiń aitýynsha, patsientterdiń basym bóligi Shymkent qalasyndaǵy aýrýhanalarda jatyr. Al keibir adamdar Túrkistan oblysynyń aýdan ortalyqtarynda emdelýde.
"Meditsinalyq kómek kórsetý úshin jalpy 22 jedel meditsinalyq brigada jumyldyrylǵan. Olardyń ishinde 4 brigada Jambyl oblysynan jiberilgen. Kúnde 12 brigada daiyndyqta otyr. Sonymen qatar, eki sanitarlyq tikushaq daiyn tur. Jalpy, Almaty qalasynan kómek kórsetý úshin eki mýltidistsiplinarlyq komanda jiberildi. Olardyń arasynda reanimatologtar, travmatologtar, balalar neirohirýrgtary bar. Olar bir operatsiia jasady. Qazir reanimatsiiada eki bala jatyr. Olarǵa qajetti kómek kórsetilgen", - dep málimet berdi Birtanov.
Aita keteiik, 24 maýsym kúni saǵat 9.30 kezinde Túrkistan oblysynyń Arys qalasyndaǵy áskeri bólim aýmaǵynda órt shyǵyp, oq-dáriler jaryldy. Áskeri bólimdegi jarylystan keiin Túrkistan oblysynda tótenshe jaǵdai jariialandy.
Tótenshe oqiǵadan keiin qarý, basqalarǵa qaýip týdyratyn zattar men nárselerdi saqtaý erejesin buzý baby boiynsha qylmystyq is qozǵaldy. Ishki ister organdary jaǵdaidy óz baqylaýyna aldy.
Qazaqstan Prezidenti Qasym-Jomart Toqaev Arys qalasyna baryp, jarylystan qiraǵan turǵyn úiler men ákimshilik nysandaryn aralady. Sonymen birge Prezident evakýatsiia beketinde turǵyndarmen kezdesip, qalany qalpyna keltirýge qajetti qarajat bólýge, barlyq tiisti kómekti kórsetýge ýáde berdi. Memleket basshysy jarylysqa kinálilerdiń zań júzinde qatań jazalanatynyn aitty.
