Qorǵanys ministriniń orynbasary Timýr Dandybaev Arysta shamamen qansha jarylystyń bolǵanyn málim etti, dep habarlaidy "Ult aqparat".
«Ártúrli baǵalaý boiynsha 30-ǵa tarta... Biraq, ol jerde eshkim naqty sanaǵan joq. Biraq, ol jerdegi qansha oq-dárigerliń saqtalǵanyn eskere otyryp, 40-50-den kem bolmaityn jarylystyń bolǵanyn boljap otyrmyz», - dedi Timýr Dandybaev OQK-da ótken baspasóz máslihatynda.
Spikerdiń aitýyna qaraǵanda, qazirgi ýaqytta Arystaǵy apat elementteri beinelengen ártúrli sipattaǵy aqparattyq aǵyn júrip jatyr.
«Ol qoimada artilleriialyq oq-dáriler, reaktivti oq-dáriler, belsendi zymyrandy snariadtar men granatomettar saqtalǵan. 1-3 oq-dáriniń ushý uzaqtyǵy - artilleriialyq nemese granatomettik bolsyn - 200 metrdei bolǵan. Iaǵni, áskeri bólim aýmaǵyn alǵan. Tek reaktivti snariadtar ushý uzaqtyǵy jaǵynan 20 shaqyrymǵa deiin shyrqap ketken. Biraq, ol snariadtar jarylmai, metall zattar kúiinde jan-jaqqa shashyraǵan. Alaida jerge túsken kezde adamdardy jaralap, tipti óltirip ketýge ábden qaýqarly edi. Máselen, qaitys bolǵan azamat dál osyndai jarylystyń epitsentrinde qalǵan», - dedi spiker.
Sondai-aq, ol strategiialyq arsenal nelikten Arystaǵy turǵyn úi keshenine jaqyn ornalasqanyn túsindirdi.
«Qazirgi ýaqytta bolǵan oqiǵaǵa bailanysty jaýapkershilikti bireýge artyp qoiýdy oilap otyrǵan joqpyz. Dese de, bolǵan jaǵdaiǵa shynaiy baǵa berilýi tiis. Biz arsenal nelikten turǵyn úi keshenine jaqyn ornalastyrylǵan dep aitpaýymyz kerek. Turǵyn úi keshenderiniń keńeiip, óskeni sonshalyq - 1930 jyldardan bergi arsenalǵa jaqyndap ketkeni eskerilýi tiis», - dedi Timýr Dandybaev Ortalyq kommýnikatsiialar qyzmetinde ótken baspasóz máslihatynda.
Ol óz sózinde atalmysh arsenal Sovet odaǵy kezinde naqty strategiialyq mańyzǵa ie bolǵanyn tilge tiek etti.
«Biraq, ol kezde Arys shaǵyn ǵana aýyl bolatyn. Qandai da bir tónip turǵan qaýip te joq edi. Ýaqyt ótti, ómir ózgerdi. Eldi meken keńeie kele strategiialyq nysanǵa jaqyndady. Biz bul másele týraly birneshe márte eskertip, tiisti usynystardy bergen bolatynbyz. Biraq, ainalyp kelgende munyń bári áleýmettik máselelerge bailanysty boldy. Iaǵni, halyqty ol jerden kóshirip, qaýipsiz jerge ornalastyrý - belgili bir qiyndyqty, ásirese qarjylyq-ekonomikalyq kúrdelilikti týdyratyn edi. Osyǵan bailanysty komissiia istiń aq-qarasyn ajyratar. Kináli adamdar tiisti jazasyn alady», - dedi Timýr Dandybaev.
