Qaraǵandylyq fýtbol bapkeri jáne oqytýshy Evgenii Hismetov Arys qalasynda erikti bolǵany úshin «Qurmet» ordenimen marapattaldy, dep habarlaidy QazAqparat.
Ol YouTube jelisindegi beinerolikten keiin Arysqa barýdy uiǵarǵan jáne 50 kún boiy qalany qalpyna keltirý jumystaryna qatysqan.
«Beinerolikte balasyn qushaqtaǵan er adam jol boiynda ketip barady. Oǵan esh kólik toqtamaidy. Áielder «Tikushaq qaida? Kómektesińder!» dep aiǵailaidy. Osy kórinisten keiin Arysqa baramyn dedim. Áielim qoryqty. Júgimdi jinap, dostarymnan qaryzǵa aqsha alyp, jolǵa shyqtym. Alǵashynda gýmanitarlyq kómek tarattym. Keiin shymkenttik jigittermen tanysyp, apattyq jaǵdaidaǵy úilerdi buzýǵa kómektestim. Úiindini KamAZ-ǵa artyp shyǵardyq. Sosyn qoimada tańǵy 8-den túngi 11-ge deiin jumys istedim. Túngi 2-den 4-ke deiin qurylys materialdaryn kútip alatynmyn. Dalada gipsokartonǵa kórpe tósep uiyqtadyq. Osylai 50 kún jumys istedim», - dedi E. Hismetov Aqordada tilshilerge bergen suhbatynda.
Keiipker óz áreketin erlik dep oilamaidy. Ol kelesi jyly Arysqa qydyryp barýdy josparlap júr.
«Keterde maǵan erikti boldy degen anyqtama berdi. Ol týraly umytyp ta ketkenmin. Biraq, tanystarym men týraly Internetke jazypty. Tilshiler suhbat aldy. Arysta «Qurban Aitty» birge toilaǵan dostarym bar, kelesi jyly solarǵa qonaqqa baramyn. Alǵashynda qatty aryqtap edim, keterde taǵy toidyryp jiberdi», - dep qaljyńdady Evgenii.
Evgenii Hismetov – úsh balanyń ákesi, «Arystan» jeke qaiyrymdylyq qorynyń quryltaishysy. Ol Qaraǵandy oblysy Saran qalasyndaǵy Arnaiy mamandandyrylǵan balalar men jasóspirimder mektebinde bapker-oqytýshy bolyp jumys isteidi.
Aita keteiik, búgin Aqordada Memleket basshysy Qasym-Jomart Toqaev jarylystan keiingi Arys qalasyn qalpyna keltirgen áskerilerdi, dárigerlerdi, tárbieshiler men eriktilerdi marapattady.
Prezidenttiń aitýynsha, Arysty qalpyna keltirýge 10 myń adam, 250 kompaniia jáne 300-ge jýyq arnaiy tehnika jumyldyryldy. Qazirgi ýaqytta nysandardyń 97% jóndeý jumystary aiaqtaldy.
.jpeg)