Búgin Arys qalasynda atqarylyp jatqan jumystar, qalanyń qazirgi jai-kúii týraly brifing ótti. Jiynda shahar basshysy Murat Qadyrbek qurylys jumystary talapqa sai júrgizilip jatqanyn málimdedi, dep habarlaidy oblys ákiminiń baspasóz qyzmeti.
«Arys qalasy kúndelikti qalypty ómirge oralyp keledi. 3 myńnan astam qurylysshy jumys istep jatyr. Olardyń arasynda jergilikti turǵyndar tartylǵan. Qazirgi tańda 340-tai úi jóndeldi. Úkimet tarapynan Arystyń árbir turǵynyna 100 myń teńge berý jóninde qaýly qabyldanǵan bolatyn. Qazirdiń ózinde arystyqtardyń 90 paiyzdan astamy osy kómekke qujat tapsyrdy. Taiaýda barlyq turǵynnyń qujaty jinalady, iaǵni, bul jumys aiaqtalýǵa jaqyn tur», - dedi ol.
QR Qorǵanys ministrliginiń ókili Qaiyrgeldi Hýsainov qala aýmaǵy men áskeri qoimadan 20 shaqyrym radiýs qashyqtyqta tekserý, tazalaý jumystary júrgizilip jatqanyn, radiatsiia qaýpi joq ekenin baiandady. Sonymen birge qaladan 60 shaqyrym qashyqtyqta oq-dárilerdiń jarylmaǵan bólshekterin joiý boiynsha josparly jumys atqarylýda. Saǵat tańǵy 9 ben 18.00 aralyǵynda jarylys dybystary estilýi múmkin jáne ol turǵyndar úshin qaýipsiz ekenin jetkizdi.
Al Túrkistan oblysy politsiia departamenti ákimshilik basqarmasynyń basshysy Almashan Tastanbekov qala aýmaǵynda tártip saqshylary turaqty jumys júrgizip jatqanyn, turǵyndardyń quqyǵyn qorǵaý jáne qoǵamdyq qaýipsizdikti saqtaý baǵytynda jumystar jolǵa qoiylǵanyn atap ótti. Turǵyndarǵa jalǵan aqparat taratý jáne arandatý boiynsha 10 adam tergelgenin, dálelsiz derek taratý qylmys ekenin jáne mundai qylmysqa barǵandar zań aldynda jaýap beretinin aitty.
