Ońtústik Qazaqstan oblysynda «Arys jaǵasynda» retro-festivali ótti. Óńirde segizinshi ret ótkizilip otyrǵan merekelik keshte elimizge belgili Turdyqylysh Iztai, Muhtar Quralov, Quralai Sátmuhanbetova, Lesbek Amanov, Erjan Serikbaev syndy kompozitorlardyń ánderi oryndaldy, dep habarlaidy OQO ákimdiginiń baspasóz qyzmeti.
Merekelik sharaǵa qatysqan oblys ákimi J.Túimebaev barsha óner súier qaýymyn quttyqtap, búgingi sharanyń mańyzdylyǵyna toqtaldy.
«Qazaq halqy - ejelden óner súigen, ónerpazdaryn qadirlegen halyq. Al óner - bizdiń rýhymyz. Rýh eshqashan da ólmeidi. Eń qasietti rýh halyqta dep bilemin. Sol sebepti de rýhaniiat halyqpen birge máńgi jasaidy. Bul festival búginde tek ońtústik jurtyna ǵana emes, búkil elge aty máshhúr. Ońtústik óńirden shyǵyp, barsha qazaqtyń maqtanyshyna ainalǵan kompozitorlardy, óner ujymdary men ánshilerdi dáripteýge, olardyń shyǵarmashylyǵyn nasihattaýǵa baǵyttalǵan bul shara ulttyq ónerdi, jergilikti daryndardy qoldaýdyń alańyna ainaldy», - dedi ákim.
Jyr keshinde jergilikti sazgerlerdiń halyq arasynda keńinen taraǵan 20 áni oryndaldy. Festivalge elimizge tanymal óner juldyzdary QR Eńbek sińirgen qairatkeri Ulyqpan Joldasov, QR Mədeniet qairatkerleri Jubanysh Jeksenuly, Shahizada Baipatshanova, Aqbota Kerimbekovalar qatysty.
Festival tarihy 1992 jyldan bastaý alǵan. Osy jyldan bastap oblysta Shámshi Qaldaiaqov atyndaǵy «Meniń Qazaqstanym» án baiqaýy ótkizilip keledi. Atalǵan baiqaý ótken jyly Shámshi aǵanyń týǵan jeri Otyrar aýdanynda ótkizilse, biyl Sozaq aýdanynda ótti. Baiqaýdyń aiasynda Ońtústik Qazaqstan oblysynan shyqqan kompozitorlardyń shyǵarmashylyǵyn nasihattaý, olarǵa qoldaý kórsetý maqsatynda 2010 jyldan bastap «Arys jaǵasynda» retro - festivali Sh.Qaldaiaqovtyń atyna berilgen osy gúlzarda jyl saiyn ótkizilip keledi.
Osymen segizinshi ret uiymdastyrylǵan retro-festival biyl da joǵarǵy deńgeide ótti.
