Arys turǵyndary 4 baǵytta evakýatsiialanýda. Bul týraly QR IIM Tótenshe jaǵdailar komitetiniń resmi ókili Nursultan Nurahmetov aitty, dep habarlaidy QazAqparat tilshisi.
"Arys qalasynyń turǵyndaryn evakýatsiialaý tórt baǵytta júrgizilip jatyr: Shymkent qalasy, Montaitas eldi mekeni (30 shaqyrym), Qabylsai eldi mekeni (25 shaqyrym) jáne Shaǵyr eldi mekeni (35 shaqyrym). Shymkent qalasynda 15 evakýatsiialyq beket qurylyp, olarǵa 170 adam jetkizilip, ornalastyryldy. Montaitas eldi mekeninde 904 adam tirkelgen, evakýatsiialanǵan halyqty tirkeý (halyq tirkeý úshin 3 jedel top qurylyp, jiberildi) jalǵasyp jatyr", - dedi ol.
Onyń dereginshe, halyqty evakýatsiialaý jumystaryna Túrkistan oblystyq, Shymkent qalalyq tótenshe jaǵdailar qyzmeti, politsiia departamentteri men jergilikti atqarýshy organdardyń kúshteri men quraldary jumyldyrylǵan. Evakýatsiialanǵan halyqqa aýyz sý jetkizilip jatyr. Arys qalasy turǵyndaryn qulaqtandyrý úshin 2 habarlandyrý júiesi iske qosylǵan.
Arysta politsiia qyzmetkerleri qoǵamdyq tártipti qorǵaý jáne evakýatsiialanǵan halyqtyń dúnie-múlkin qorǵaýǵa jumyldyrylǵan. Sonymen qatar quqyq qorǵaý organdarynyń qyzmetkerleri oqiǵa oryn alǵan jerdi oqshaýlaý jumystaryn júrgizip, halyqty Arys qalasynan shyǵarý sharalaryna da qolǵabys tiigizip jatyr. Munan bólek, Arystaǵy qoǵamdyq tártipti qorǵaýǵa Shymkent qalasyndaǵy QR IIM Ulttyq gvardiiasy áskeri bóliminiń 500 jaýyngeri jiberilgen. Tótenshe oqiǵa oryn alǵan jerge IIM men jergilikti atqarýshy organdardyń shamamen 1000 mamany men 160 tehnikasy shoǵyrlandyrylǵan. Taraz qalasynyń TJK "Qazaviaqutqarý" AQ-nyń Evrokopter EC-145 tikushaǵy da qajet kezde kómek kórsetýge daiyn tur.
"Azamattyq qorǵanys kúshteriniń is-qimyldaryn úilestirý úshin oqiǵa ornynda QR IIM TJK tóraǵasy, general maior V.Bekker, "Ońtústik" óńirlik qolbasshylyǵy qolbasshysynyń birinshi orynbasary-shtab bastyǵy A.Qaskelenov, QR IIM Tergeý departamenti bastyǵynyń orynbasary polkovnik K.Nurmaǵambetov júr", - dedi N.Nurahmetov.
Resmi ókil dereginshe, respýblika boiynsha arnaiy qurylǵan qaýyrt jelige halyqtan 878 qońyraý, onyń ishinde TJK shtaby qaýyrt jelisine 28 qońyraý túsip, olar der ýaqytynda Shymkent qalasyndaǵy TJD shtabyna berilgen.
"Arys qalasynda oryn alǵan oqiǵa bailanysty Túrkistan oblysynda qaýyrt jeli jumys istep tur: Shymkent qalalyq TJ departamentinde 8(7252)44-94-72, 35-33-66, Túrkistan oblystyq TJ departamentinde: 8(7253)35-83-02, IIM Tótenshe jaǵdailar komitetinde 8(7172)53-32-84, 53-32-79. Atalǵan nómirler arqyly ózińizge qajetti aqparattardy táýlik boiy ala alasyzdar", - dedi ol.
