«Qazgidromet» RMK mamandary Arys temirjol stantsiiasynda sary fosfor tielgen konteinerdiń janýyna bailanysty Arys qalasyndaǵy atmosferalyq aýa sapasyn tekserdi, dep habarlaidy "Ult aqparat" Qazgidrometke silteme jasap.
6 tamyz kúni saǵat 17:20-da Arys stantsiiasynyń platformasynda sary fosfory bar júktiń janýyna bailanysty «Qazgidromet» RMK-nyń Túrkistan oblysy boiynsha filialynyń monitoring zerthanasy, jospardan tys irikteý jáne atmosferalyq aýa synamalaryn analizdeý úshin Arys qalasyna bardy», - delingen habarlamada.
Órt shyqqan Naýryz shaǵynaýdany qalanyń ońtústik-batys bóliginde, shet jaǵynda ornalasqan. Qala turǵyndarynyń sany 1700 adamdy quraidy. Lastaýshy zattardyń shoǵyrlanýy kelesi himiialyq qosylystar boiynsha ólshendi: qalqyma zattar, azot dioksidi, kúkirt dioksidi, kómirtek oksidi, kúkirtti sýtek, formaldegid jáne ammiak. Ólsheý 6 núktede júrgizildi. Olar:
№1 núkte: Qazybek bi kóshesi, Ortalyq alań (t/j vokzaly aýdanynda).
№ 2 núkte: Órkendeý k-si, Naýryz sh/a, irikteý ýaqyty 14:15.
№ 3 núkte: Qalanyń soltústik bóligi.
№ 4 núkte: E.Moldabaev atyndaǵy orta mektep., Madaliev k-si.
№ 5 núkte: ortalyq aýdandyq aýrýhananyń jany, Jumabaev k-si.
№ 6 núkte: aýdan ákimdiginiń jany, Erkobek k-si.
«Ólsheý nátijeleri boiynsha shekti ruqsat etilgen shoǵyrlanýdan asyp ketý anyqtalǵan joq. Radiatsiialyq fonnyń deńgeii norma sheginde», - dep qorytyndylady sinoptikter.
Aita keteiik, sary fosfor – óte ýly (aýadaǵy ShRK 0,0005 mg/m3), spetsifikalyq sarymsaq iisti zat. Sýda erimeidi, aýada tez totyǵady jáne fosfor oksidiniń aq tútinin túzip, ózdiginen janady.
Eske salaiyq, 6 tamyz kúni Arys stantsiiasynda shamamen keshki saǵat 18:30-da sary fosfor tielip, Jambyl oblysynan Reseige jóneltilgen eki konteiner órtendi. Oblys ákimi baspasóz qyzmetiniń habarlaýynsha, tirkemede barlyǵy 64 vagon bolǵan. Túrkistan oblysy ákiminiń orynbasary Sáken Qalqamanov Naýryz aýdanynyń turǵyndaryna qaýipsiz jerge kóshýge keńes berdi.
Keiinirek Arys qalasynyń Naýryz aýdanynan 1700 adam qaýipsiz jerge kóshirildi.
7 tamyz kúni túnde Túrkistan oblysynyń ákimdigi órt tolyqtai sóndirilgenin, evakýatsiialanǵan turǵyndar alańsyz úilerine qaita alatynyn habarlady.
