Arys aýmaǵyn oq-dárilerden tazartýǵa 5 jyl ketýi múmkin. Bul týraly sársenbi kúngi onlain-brifing kezinde Qazaqstan qarýly kúshteri bas shtaby bastyǵynyń birinshi orynbasary Rýslan Shpekbaev habarlady.
"[Oq-dárilerden tazartý jumystary] Tez aiaqtalady dep aitý erte. Biraq eki-úsh-bes jyl kóleminde bitip qalar" dedi Shpekbaev.
Ol qarýly kúshterdiń tazartý jumystaryn tez aiaqtaýǵa tyrysyp otyrmaǵanyn, eń bastysy "aldaǵy ýaqytta eshkim zardap shekpeitindei árbir aýmaqty kezeń-kezeń boiynsha muqiiat tazalaý" ekenin atap ótti.
Byltyr maýsym aiynda Arys qalasyndaǵy áskeri bólimniń oq-dári qoimasy jarylyp, 4 adam qaza bolyp, ondaǵan adam jaraqattanǵan bolatyn. Myńdaǵan úige zaqym kelip, Arystyń 40 myńnan astam turǵyny Shymkent qalasy men tóńiregindegi eldimekenderge evakýatsiialanǵan edi.
Sársenbi kúngi onlain-brifing kezinde tómendegidei málimet aityldy:
- Jarylys bolǵan aýmaq 500 gektar jerdi quraidy. 133 gektar (28,5 paiyzy) aýmaqtyń ústińgi beti tazartylǵan;
- Bir jyl ishinde Arystan shamamen 380 myń oq-dári fragmenti áketilgen, olardyń 300 myńy - jarylýy múmkin bólshekter;
- Oq-dári bólshekterin joiý boiynsha negizgi jumys Arys qalasynan 50 shaqyrym jerdegi "Bastarma" poligonynda júrgiziledi;
- Mobildik saperler tobyna jergilikti turǵyndar tarapynan 740 ótinish túsken, 4,5 myń oq-dári bólshegi zalalsyzdandyrylǵan.
Buǵan qosa, brifing kezinde Arys qalasynyń infraqurylymy "90 paiyz qalpyna keltirilgeni" aityldy. Arys qalasy ákiminiń aitýynsha, 8 myńǵa jýyq úige jóndeý júrgizilgen. "Keibir úilerdiń sapasyz jóndelgeni nemese salynǵany týraly" shaǵymdarǵa bailanysty jaýap bergen Arys qalasynyń ákimi Murat Qadyrbek "biren-saran osyndai jaǵdailar bolýy múmkin. Bul másele zań sheńberinde sheshiledi. Eger turǵyn jóndeý jumystarynan keiin úiinen belgili bir jasyryn aqaýlar tapsa, biz merdiger kompaniiany shaqyryp, jóndeý jumystaryn júrgizip beremiz" dedi.
Shamamen eki apta buryn Shymkenttegi áskeri garnizon sotynda jarylysqa bailanysty qozǵalǵan is boiynsha sot bastalǵan edi. Bul iste 16 aiyptalýshy, 1 500 jábirlenýshi bar.
