Almatydaǵy tiinniń ainalasyndaǵy daý áli de tyiylar emes. Bul joly «DOM» qaiyrymdylyq qorynyń negizin qalaýshy Arýjan Saiyn «Atakent» mańynda ornalasqan nysanǵa qatysty óz pikirin bildirdi. Qoǵam belsendisi "tiinge ketken aqshany balalardyń densaýlyǵyna jumsamai ma" dep ashyndy.
«Jurt jol salýǵa, basqaǵa aqsha surasa, biz balalar úshin qarajat bólýin ótinemiz. 2 jyl boldy jetim, aýrý balalarǵa dep aqsha surap kele jatqanymyzǵa. Bizge joqtan bótendi aitpaidy. Almatyda mýkovistsidoz dertimen aýyratyn 16 bala bar. 23 million teńgege 21 bala emdelip shyǵar edi», - deidi Arýjan Saiyn.
Aita keteiik, tiindi jasaýǵa 23 million teńge qarajat jumsalǵan. Onyń 15 millionyn memleket, al qalǵan 8 milliondy Funk tólegen. Músinniń biiktigi 12 metr. Týyndyny salǵan avtorlardyń ishinde Ońtústik Afrikadan kelgen Mariýs Iansen Van Výýren bar.
