Qazaqstandaǵy bala quqyqtary jónindegi ýákili Arýjan Sain tótenshe jaǵdai rejiminde «Meiirim» erikti qoǵamy» qorynynyń jumysy men múmkindigi shekteýli balalarǵa qalai kómek kórsetiletini týraly aitty, dep habarlaidy QazAqparat.
Onyń aitýynsha, qazir tótenshe jaǵdai kezinde qordyń atqarylatyn jumys aýqymdy.
«Qazirgi ýaqytta qor Bala quqyqtary jónindegi ýákil keńsesiniń jumysyn júzege asyrýda. Qor ádette ainalysatyn baǵytymen ǵana shektelip qalmaidy. Alaida bizde problema bar. Tótenshe jaǵdaiǵa bailanysty «Balalarǵa ómir syila» jobasynyń balalary emdelýge shetelge shyǵa almaidy, óitkeni barlyq elder jabyq. Qudaiǵa shúkir, josparly jáne jaǵdaiy aýyr balalar joq. Emdeý saparlary keiinge shegerildi», - deidi Arýjan Sain.
Sonymen qatar, ol qorǵa qaiyrymdylyq kórsetetin azamattardyń azaiǵanyn atap ótti.
«Pandemiia saldarynan adamdardyń qarjylyq jaǵdaiy qiyndap barady. Kóptegen kásipkerlerdiń biznesi toqtap qaldy. Biz qoǵamdyq uiymbyz jáne azamattardan qaiyrymdylyq jinaimyz, sondyqtan kez kelgen daǵdarysty biz birinshi bolyp sezinemiz», - dedi A.Sain.
Onyń aitýynsha, kómek suraityndar óte kóp. Balalardyń da sany artyp keledi.
«Karantin aiaqtalǵannan keiin biz balalardy emdelýge jiberemiz. Árine, jasalatyn operatsiialarǵa aqsha kerek. Bul úlken másele. Ony qalai sheshemiz ázirge belgisiz. Búgingi tańda «Balalarǵa ómir syila» jobasynda 60-qa jýyq bala kómekke zárý. Olardyń arasynda arqa-bifida, epilepsiia, sirek kezdesetin genetikalyq teri aýrýlary, epidermoliz, mýkovistsidoz aýrýymen aýratyn balalar bar»,- dedi ol.
Arýjan Sainnyń aitýynsha, karantinge bailanysty álemdegi kóptegen kásiporyndardyń jabylýy men logistika máselesi dári-dármekti jetkizýde aitarlyqtai qiyndyqtar týyndatyp otyr.
«Biz qazir demeýshiler esebinen epilepsiiamen aýyratyn naýqastarǵa arnalǵan dári-dármekti satyp alý úshin izdestirip jatyrmyz. Birqatar balalar Qazaqstanda tirkelmegen dári-dármekti qabyldaidy jáne olar óte qymbat. Buryn ata-analar dárini ózderi Túrkiiadan jáne basqa elderden aldyratyn. Ókinishke orai qazir ondai múmkindik joq. Óitkeni karantinge bailanysty halyqaralyq reister toqtady. Qazir «SQ-Farmatsiianyń» kómegimen kelissózder júrgizip jatyrmyz. Aqshasyn tóleitin demeýshiler tabyldy, endi jetkizý máselesi tez sheshiledi dep úmittenemiz. Kóptegen balalardyń dárisi taýsylýǵa jaqyn qaldy», - dep túsindirdi Arýjan Sain.
Sonymen qatar, ol karantin kezeńinde dárigerler men klinikalarǵa kórsetiletin kómek týraly aitty.
«Biz qor demeýshileriniń esebinen jeke qorǵanys quraldaryn, bir ret qoldanylatyn jáne qaita paidalanýǵa bolatyn kiimderdi, dárigerlerge arnalǵan qorǵanys ekrandaryn, dezinfektsiia suiyǵyn, meditsinalyq jabdyqtar satyp aldyq. Alǵashqy 10 myń dana partiiany Almaty emhanalary men birqatar oblystarǵa jiberdik. Bul óte qajet edi. Seriktesterimizdiń arqasynda taǵy 60 myń qorǵanys ekrany satyp alyndy. Qyzylorda, Jambyl oblystaryna qorǵanys kiimderi men basqa da kómek jiberildi. Bul eki aimaq Almaty men Nur-Sultannan keiin indet juqtyrǵandar boiynsha kósh bastap tur. Qaraǵandy oblysy da nazardan tys qalmady. Shymkent qalasymen de jumys istep jatyrmyz. Dezinfektsiialyq qural men meditsinalyq maskany emhanalarǵa, balalar jáne qarttar úilerine jiberdik. Sonymen qatar, aýrýhanalardan shyqpai jumys istep jatqan almatylyq dárigerlerge tamaq jiberemiz», - dedi ol.
Búgingi kúni qor «Balalarǵa ómir syila» jobasynyń aiasynda 1 855 balaǵa kómek kórsetti, kóptegen balalardy emdeý birneshe kezeńnen turady, sáikesinshe 2 791 operatsiia/emdeý kýrsy tólendi.
Arýjan Sain atap ótkendei, qor álemniń 70-ten astam elindegi klinikalarmen jumys isteidi. Negizgi printsip - emdeý sapasy men quny. Qor múmkindiginshe kóp balalarǵa kómektesý úshin qazaqstandyq kásipkerler kórsetken kómekti tiimdi jumsaýǵa tyrysady.
Sóz sońynda ol barlyǵyn karantin rejimin saqtaýǵa, úide bolýǵa shaqyrdy.
