Arýjan Sain denesinen ineler tabylǵan qyz jaily aityp berdi. Onyń aitýynsha, oqiǵa Ońtústik Qazaqstan oblysynda bolǵan. Arýjan Sain bul týraly Facebook jelisindegi paraqshasynda jazdy, - dep habarlaidy Tengrinews.kz tilshisi.
"(...) 2016 jyldyń basynda bizdiń qorǵa Aina esimdi qyzdyń ákesi habarlasty. Aina 2011 jyly týylǵan. Ákesi qyzynyń óńeshi kúiip qalýyna bailanysty ony shetelde emdeýge jiberýdi suraǵan. Qordaǵy tártipke sáikes, biz balanyń ata-anasynan alynǵan meditsinalyq qujattardyń barlyǵyn túrli klinikalarǵa joldadyq, olardyń ishinde Indiianyń "Fortis" "MedIndiia" klinikalar jelisine de joldadyq.
Meditsinalyq jazbalardy alǵan "MedIndiia" klinikasynyń qyzmetkerleri qyzdyń jaǵdaiyna tańǵaldy. Biz qazaqstandyq dárigerlerden de keńes aldyq, olar da sheteldik áriptesteri shyǵarǵan qorytyndyny rastady. Qujattarǵa qarap, qyzdyń densaýlyǵyna aýyr ziian kelip jatqanyn jáne onyń ólimge ákelýi múmkin ekenin aitty", - dep jazdy Sain.
"Qyzdyń densaýlyǵy jaily hronologiialyq málimette bylai jazylǵan:
- 2012 jyldyń maýsymynda (qyz bir jasta) - aýyr bas-mi jaraqaty. Qyzdyń ózi qulap ketkeni aitylady.
- 2013 jyldyń qańtarynda (qyz bir jarym jasta) - denesinen ineler tabyldy. Qyzdyń mundai jasta óz-ózine ine tyǵýy múmkin emes.
- 2013 jyldyń mamyrynda (qyz áli 2 jasqa tolǵan joq) óńeshi kúiip ketken. Ainanyń óńeshinen bastap asqazanyna deiin kúiip ketken. Aýzy men murny da kúiip qalǵan. Sol sátten bastap qyz óz betinshe tamaq jei almaidy. Tek suiyq taǵamdy arnaiy apparat arqyly jeidi. (...), - dep jazdy Arýjan Sain.
Sondai-aq, onyń aitýynsha, olar osy jaǵdai jaily Bas prokýratýraǵa hat joldap, qandai da bir sharalardy qoldanýdy surap otyr.
"Áli kúnge deiin qyzdyń jaǵdaiy jaily málimet joq - tiri ma, joq pa bilmeimiz. Ákesi telefon nómirin aýystyryp tastaǵan siiaqty. Qalai kómekteserimizdi bilmei otyrmyz. Munymen qajetti jáne mindetti adamdar ainalysýy kerek!", - dep jazdy qoǵamdyq qordyń jetekshisi.
Munymen qosa, Arýjan Sain balalarǵa qatysty kelip túsken shaǵymdar men ótinishterdi qarastyrýǵa shaqyrdy.
