«ArselorMittal Temirtaý» AQ jáne kásiporynnyń birqatar laýazymdy tulǵasy óndiris oshaǵynda bolǵan apatqa júz paiyz kináli. Bul týraly QR Indýstriia jáne infraqurylymdyq damý ministrliginen málim etti, dep habarlaidy "Ult aqparat".
Vedomstvo málimetinshe, 2018 jyldyń 10 qarashasy kúni saǵat 19-38-de «ArselorMittal Temirtaý» AQ-da apat saldarynan toptyq jazataiym oqiǵa boldy. Apat saldarynan ottegi tsehynyń aýa bólý ónimderiniń tehnologiialyq qubyrlary buzyldy. Tórt adam zardap shekti. Bolǵan apatty tergep, tekserý jáne jazataiym oqiǵanyń sebepterin anyqtaý úshin Qaraǵandy oblystyq eńbek inspektsiiasynyń 2018 jylǵy 12 qarashadaǵy № 205 buiryǵymen ónerkásiptik qaýipsizdik salasyndaǵy ýákiletti organ ókiliniń tóraǵalyǵymen komissiia quryldy.
Komissiia QR Eńbek kodeksiniń 189-babynyń 1-tarmaǵyna jáne 190-babynyń 10-tarmaǵyna sáikes arnaiy tekserý júrgizdi jáne usynylǵan materialdar, kýágerler men qatysy bar adamdardan suraq-jaýap negizinde saraptamalyq kishi komissiianyń qorytyndylarymen tanysyp, tómendegilerdi anyqtady. Atap aitqanda, tehnologiialyq qubyrlardyń buzylýyna mynadai sebepter boldy:
Birinshi, 2018 jyldyń 6 qarashasynan bastap apatqa deiin joǵary qysymdy ottegi jáne joǵary qysymdy azot qubyr joldaryndaǵy shyǵys pen qysym shamalarynyń úlken deńgeide aýytqýyna bailanysty qubyr joldaryna edáýir dinamikalyq salmaq túsken. Sonyń saldarynan 09G2S bolattyń ornyna 20 MS 1050-84 bolattan jasalǵan 126k jáne 127k tireýishteriniń arasynda 2003 jyly ornatylǵan diametri 720 mm joǵary qysymdy ottegi qubyr joldarynyń tik syzyqty ýchaskesimen 90º buryshy tarmaqtyń dánekerlengen jeri úzildi.
Ekinshi, «Linde Qazaqstan» JShS bloktarynan aýany bólý ónimderin berýdi der kezinde sóndirmeý bul apattyń taralýyna jáne buzylý kóleminiń úlkeiýine áser etti.
«Komissiia «ArselorMittal Temirtaý» AQ jáne kásiporynnyń birqatar laýazymdy tulǵasy oryn alǵan apatqa júz paiyz kináli degen qorytyndyǵa keldi. Jumys nátijeleri boiynsha komissiia bolǵan apattyń sebepterin joiý jáne bolashaqta osyndai jaǵdailardyń qaitalanýyn boldyrmaý úshin 15 is-shara ázirledi. Bul is-sharalardyń oryndalýyn baqylaýdy ónerkásiptik qaýipsizdik salasyndaǵy ýákiletti organ júzege asyratyn bolady», - dep atap ótedi ministrlikten.
