«ArselorMittal Temirtaý» AQ kompaniiasynyń basshylyǵy men qyzmetkerleri búgin tańerteń Shahtinsk qalasynda qaza tapqan kenshilerdiń týystary men jaqyndaryna kóńil aitty.
«Qaza tapqandardyń otbasyna tolyq kólemde kómek kórsetiledi. Jerleý rásiminiń barlyq shyǵyndaryn kompaniia óz moinyna alady», - delingen «ArselorMittal Temirtaý» AQ habarlamasynda.
Kompaniia basshylyǵy «Qazaqstan» shahtasyndaǵy úsh kenshi qaza tapqan qaiǵyly jaǵdaidyń mán-jaiyn habarlady.
Oqiǵa tańerteń bolǵan. 31 tamyz kúni tańǵy saǵat tórtten óte AGQ (avtomattandyrylǵan gaz qorǵanysy) operatory taý dispetcherine 332 D6-1-3 jeldetkish túiisiminde metan kenjardy baqylaý tetiginen bailanys joǵalǵany týraly jáne shahtanyń batys jeldetkish uńǵysynda metan deńgeiiniń kóterilgenin habarlaǵan. Shahta basshylyǵy tez arada jaǵdaidy anyqtaý sharalaryn júrgizgen: kenjarǵa Kásibi áskerilendirilgen apattyq qutqarý qyzmetiniń eki bólimshesi men sol ýchaskeniń taý sheberin jibergen.
Tańǵy saǵat 6-da úńgýshiler osy kenjardan óli kúiinde tabyldy. Aldyn ala derek boiynsha qaiǵyly jaǵdai kenetten metannyń (gaz dinamikalyq qubylys) taralýy saldarynan bolǵan. Oqiǵa kezinde shahtada 132 adam bolǵan, onyń 129-y apatty joiý josparyna sáikes ózderi jerdiń betine shyqqan.
Kásibi áskerilendirilgen apattyq qutqarý qyzmetiniń 49 qyzmetkeri men 9 tehnika apatty joiý jumystaryn júrgizýge tartyldy. Shahtadaǵy jumys ýaqytsha toqtatyldy. Oqiǵanyń mán-jaiyn anyqtaý úshin arnaiy memlekettik komissiia quryldy, tergeý júrip jatyr. Tergeý nátijesi komissiia jumysy aiaqtalǵannan keiin belgili bolady.
