Foto: primeminister.kz
Qazaqstan Úkimeti "ArselorMittal Temirtaý" AQ aktivine sheteldik investordy tartpaidy. Bul týraly ónerkásip jáne qurylys ministri Qanat Sharlapaev málimdedi, dep habarlaidy Sputnik Qazaqstan.
"Úkimet menshik quqyǵy Qazaqstan paidasyna ótkennen keiin eshqandai sheteldik investordy qarastyrmaidy. Kásiporyndaǵy qazirgi sharttar, eńbekaqy tóleý, qyzmetkerlerdiń sany – barlyǵy ózgerissiz qalady", - dep sendirdi Sharlapaev Úkimette ótken brifingte.
Onyń aitýynsha, kompaniiaǵa biýdjet qarajaty jumsalmaidy.
Sondai-aq ministr kásiporyn Qazaqstan paidasyna ótkennen keiin kompaniia ataýy ózgeretinin aitty.
"Qazaqstandyq kásiporynnyń aktsionerleri quramynan "Arselordyń" shyǵýyna bailanysty biz "Arselor" ataýyn paidalana almaimyz. Ázirge jańa ataýy qandai bolatynyn aqyldasqan joqpyz. Biraq eń mańyzdysy – kombinat qyzmetkerleriniń pikirin eskerý dep oilaimyn", - dedi Sharlapaev.
Eske salsaq, Kostenko atyndaǵy shahtadaǵy apattan keiin Prezident "ArselorMittal Temirtaýmen" investitsiialyq yntymaqtastyqty toqtatýdy tapsyrdy. Osydan keiin Úkimet kompaniiany Qazaqstan paidasyna berý týraly mámilege qol jetkizilgenin habarlady.
