QR Indýstriia jáne infraqurylymdyq damý ministrligi jumysshylardy qysqartpaý týraly iri kompaniialarmen kelissóz júrgizdi, dep habarlaidy "Ult aqparat".
Bul týraly ministrdiń mindetin atqarýshy Qaiyrbek Óskenbaev aityp berdi.
«Halyqty jumyspen qamtýda bizdiń sala boiynsha óńirge qaraityn 700 myńdai adam jumys isteidi. Úkimet tapsyrmasymen «Arselor Mitall», «Qaztsink», «Qazaqmys» syndy iri kompaniialarmen kelisimshartqa otyrdyq, jumyskerler sanyn qysqartýǵa tyiym salynǵan. Múmkin jarty kúnge jiberetin shyǵar, biraq eshkimdi tolyq qysqartpaidy», - dedi Q. Óskenbaev ortalyq kommýnikatsiialar qyzmetinde ótken brifingte.
Onyń aitýynsha, jol salasynda 200 myńǵa jýyq adam jumys isteidi. Berilgen tapsyrma boiynsha, olar 100 paiyz qazaqstandyq ónimdi paidalanýy tiis jáne eshkim jumystan qysqarmaýy kerek.
«Ásirese daǵdarys kólik salasyna eń kóp yqpal etti. Áýe, temirjol, avtokólik barlyǵynyń qozǵalysy toqtap qaldy. Biraq biz «Qazaqstan temir joly», «Eir Astana», «Skat» syndy kompaniialarmen kelistik. Temirjol salasynda - 125 myń adam, aviatsiiada - 20 myńnan astam adam jumys isteidi. Munda da eshkim qysqartylmaidy. Barlyǵy óz ornynda qalady», - dedi vedomstvo ókili.
Ministrlikke qaraityn taǵy úlken sala - qurylysta 600 myńnan astam adam jumys isteidi.
«Qazir Úkimet qurylys máselesine kóp kóńil bólip otyr. Sebebi, qurylys - eń kóp jumysty qamtityn sala. Oǵan qosymsha qarajat bólip, qosymsha jumys oryndaryn ashý máselesin alǵa qoiyp otyrmyz», - dedi Qaiyrbek Óskenbaev.
