Memleket basshysynyń jylý maýsymyn turaqty ári úzdiksiz ótkizý jónindegi tapsyrmalaryn oryndaý sheńberinde Qazaqstan Respýblikasy Úkimetiniń rezervinen Qostanai oblysynyń Arqalyq qalasyndaǵy jylý magistralin rekonstrýktsiialaý jáne elektr jelilerin jańartý jobalaryn aiaqtaýǵa 5,8 mlrd teńge bólindi, dep habarlaidy ult.kz.
Tiisti qaýlyǵa Premer-ministr Oljas Bektenov qol qoidy.
Bólingen qarajat eki baǵyt boiynsha qarastyrylǵan:
- 3 mlrd teńge – qalanyń elektr jelilerin rekonstrýktsiialaýǵa;
- 2,8 mlrd teńge – uzyndyǵy 8,3 shaqyrym jylý magistralin jańǵyrtý jumystaryn aiaqtaýǵa.
Atalǵan jumystardy júrgizý qajettiligi Arqalyq qalasyndaǵy jylý jáne elektrmen jabdyqtaý júieleriniń tozý deńgeiiniń joǵary bolýyna bailanysty týyndap otyr. Energetikalyq infraqurylym nysandarynyń edáýir bóligi 1970 jyldardan beri jumys istep kele jatqandyqtan keshendi jańartýdy qajet etedi.
Jylýmen qamtý salasynda 2025 jyly Arqalyq qalasynyń jylý jelilerin jóndeýge 914 mln teńge baǵyttaldy. Onyń 645,5 mln teńgesi – Úkimet rezervinen, qalǵany – oblystyq biýdjetten. Bólingen qarajat esebinen 1,6 shaqyrym jeli jańartyldy.
Jylý magistraliniń qalǵan bóligin rekonstrýktsiialaý jumystaryn aiaqtaý jylý jelileriniń tozý deńgeiin 25%-ǵa tómendetip, jalpy qaladaǵy jylýmen jabdyqtaý júiesiniń jumys isteý senimdiligin arttyrýǵa múmkindik beredi.
Elektr jelilerin jańartý jobasy aiasynda úsh qosalqy stansany rekonstrýktsiialaý, 110, 35 jáne 10 kV kerneýli elektr berý jelilerin salýdy jáne rekonstrýktsiialaý, uzyndyǵy 37,8 shaqyrym bolatyn jelilerdegi aǵash baǵandardy temirbeton tirekterge aýystyrý josparlanǵan. Bul sharalar Qostanai oblysynyń Arqalyq qalasynyń, Jangeldin jáne Amangeldi aýdandarynyń 58 myń turǵynyn turaqty elektrmen jabdyqtaýdy qamtamasyz etedi.
Jalpy, Úkimet qabyldap otyrǵan infraqurylymdy jańǵyrtý sharalary óńirdiń tirshilikti qamtamasyz etý júieleriniń turaqtylyǵyn arttyrýǵa, halyqtyń ómir súrý sapasyn jaqsartýǵa jáne Arqalyq qalasy men oǵan irgeles aýdandardyń odan ári áleýmettik-ekonomikalyq damýyna negiz qalyptastyrýǵa baǵyttalǵan.
