Arnaiy ekonomikalyq aimaqtardyń jumys isteý merzimin 49 jylǵa deiin uzartý qajet. Bul týraly Úkimet otyrysynda QR Indýstriia jáne infraqurylymdyq damý ministri Beibit Atamqulov aitty, dep habarlaidy "Ult aqparat".
«Memleket basshysy arnaiy ekonomikalyq aimaqtar qyzmetiniń tiimdiligi tómendigin jáne jobalardyń álsiz tolyqtyrylýy baiqalatynyn atap ótti. Mysaly, Himpark-Taraz aýmaǵynda qurylǵan sátten bastap barlyǵy 1 joba iske qosylǵan, Qorǵas-Shyǵys qaqpasy men «Qorǵas» Halyqaralyq shekaralyq yntymaqtastyq ortalyǵynda da jaǵdai osyndai. Biz árbir arnaiy ekonomikalyq aimaq boiynsha taldaý júrgizdik. Damyǵan elderdiń tájiribesin zerdelep, mynadai jańa tásilderdi usynamyz.
Birinshi. Álemdegi tabysty arnaiy ekonomikalyq aimaqtardyń tájiribesin qarai otyryp, jumys isteý merzimin 49 jylǵa deiin uzartýdy jón dep sanaimyz.
Ekinshi. Arnaiy ekonomikalyq aimaqtardyń aýmaqtaryndaǵy qyzmet túrleriniń basymdyǵyn alyp tastaý jáne óńdeýshi ónerkásiptiń barlyq salalary men sektorlary úshin qoljetimdilikti qamtamasyz etý», - dedi ministr.
Onyń atap ótýinshe, úshinshiden, árbir investor úshin jeńildikti toptamanyń investitsiialar kólemi boiynsha ólshemderge sáikestigine bailanysty túrli qoldanylý merzimderin usyný qajet. Tórtinshiden, jaýapkershilik qarastyrylady. Iaǵni, mindettemeler oryndalmaǵan jaǵdaida, biznes tiisti kezeń úshin barlyq jete eseptelmegen salyqtardy qaitarýy tiis.
«Besinshi, Arnaiy ekonomikalyq aimaqtardyń aýmaqtarynda jobalardy iske asyrý úshin daiyn óndiristik úi-jailardy usyný múmkindigin qarastyrýdy usynamyz», - dedi Beibit Atamqulov.
