Qazaqstanda arnaýly áskeri jiyn qatysýshylaryna áskeri shen beriledi. Bul týraly QR Qarýly Kúshteri Bas shtaby basshysynyń orynbasary Serik Boranbaev aityp berdi, dep habarlaidy QazAqparat.
«Kezekti áskeri shen beriledi. Biraq, onyń jiynnan ótý qorytyndysy boiynsha beriletinin eskergen jón. Ony tiisti qolbasshylyq belgileidi jáne solardyń ótinishimen jergilikti áskeri basqarý organdary sheshim qabyldaidy», - dep túsindirdi Serik Boranbaev Ortalyq kommýnikatsiialar qyzmetinde ótken brifingte.
Sonymen birge, spiker ákimderdiń óz aýmaǵyndaǵy qaýipsizdikti qamtamasyz etýge, strategiialyq nysandar men qoǵamdyq tártipti saqtaýǵa, azamattyq qorǵaý sharalaryn ótkizýge mindetti ekenin atap ótti.
«Qorǵanys ministri Nurlan Ermekbaev aitqandai, jergilikti atqarý organdarynyń basshylary jiyn ótkizý boiynsha jaǵdaiǵa qarai derbes sheshim qabyldaidy. Aýmaqtyq ásker Qarýly Kúshter quramyna kiredi, biraq olar naqty óńirdiń múddesine qarai tiisti mindetterdi atqarýy kerek», - dedi Serik Boranbaev.
Aita keteiik, 2 sáýir kúni Memleket basshysy Qasym-Jomart Toqaev áskeri mindettilerdi arnaýly jiynǵa shaqyrý týraly Jarlyq shyǵarǵan edi.
Arnaýly jiyn Qazaqstannyń birneshe óńirinde ǵana júrgiziledi.
Qazirgi ýaqytta respýblika boiynsha 473 áskeri mindetti arnaýly jiynǵa shaqyrylǵan.
