Armeniianyń arnaiy tergeý qyzmeti burynǵy prezident Serj Sargsianǵa "iri kólemde aqsha jymqyrdy" degen aiyp taqty. Tergeý organdarynyń dereginshe, Sargsian 2013 jyly fermerlerge janar-jaǵar mai alýy úshin bólingen bir million dollarǵa jýyq qarajatty "jymqyrýdy uiymdastyrǵan".
Arnaiy tergeý qyzmetiniń habarlaýynsha, Sargsian fermerlerdi janar-jaǵar maimen qamtamasyz etý úshin jariialanǵan memlekettik tenderdiń jumysyna kedergi keltirip, Armeniiaǵa uzaq ýaqyt munai ónimderin tasymaldaǵan Flash kompaniiasynyń jeńýi úshin jaǵdai jasaǵan. Armeniianyń aqparat quraldarynyń jazýynsha, Flash kompaniiasy 65 jastaǵy eks-prezidenttiń jaqyn dostarynyń biri Barsek Beglarianǵa tiesili.
Armeniia úkimeti jaǵdaiy nashar myńdaǵan fermerlerdi benzinmen qamtamasyz etýi úshin Flash kompaniiasyna 3,8 million dollar bólgen. Arnaiy tergeý qyzmetiniń dereginshe, Flash-tiń básekelesi "Makshýr" kompaniiasy arzan baǵa usynsa da, baiqaýdan ótpei qalǵan. Eger ol kompaniia tenderdi jeńgen bolsa, úkimettiń kóp qarajatty únemdep qalýy múmkin edi.
Serj Sargsian "istiń saiasilanǵanyn" aityp, taǵylǵan aiyptardy joqqa shyǵardy. Eger sotta burynǵy prezidenttiń kinási dáleldense, 4-8 jyl aralyǵynda bas bostandyǵynan airylýy múmkin.
Armeniiany 2008-2018 jyldar aralyǵynda basqarǵan Serj Sargsian 2018 jyly sáýir aiynda úkimetke qarsy narazylyq jalǵasyp jatqan kezde qyzmetinen ketti. Jańa premer-ministr Nikol Pashinian basqaratyn jańa úkimet jemqorlyqty joiýǵa ýáde berip, burynǵy basshylardyń ústinen is qozǵalǵan.
