ارمەنييانىڭ ارنايى تەرگەۋ قىزمەتٸ بۇرىنعى پرەزيدەنت سەرج سارگسيانعا "ٸرٸ كٶلەمدە اقشا جىمقىردى" دەگەن ايىپ تاقتى. تەرگەۋ ورگاندارىنىڭ دەرەگٸنشە, سارگسيان 2013 جىلى فەرمەرلەرگە جانار-جاعار ماي الۋى ٷشٸن بٶلٸنگەن بٸر ميلليون دوللارعا جۋىق قاراجاتتى "جىمقىرۋدى ۇيىمداستىرعان".
ارنايى تەرگەۋ قىزمەتٸنٸڭ حابارلاۋىنشا, سارگسيان فەرمەرلەردٸ جانار-جاعار مايمەن قامتاماسىز ەتۋ ٷشٸن جارييالانعان مەملەكەتتٸك تەندەردٸڭ جۇمىسىنا كەدەرگٸ كەلتٸرٸپ, ارمەنيياعا ۇزاق ۋاقىت مۇناي ٶنٸمدەرٸن تاسىمالداعان Flash كومپانيياسىنىڭ جەڭۋٸ ٷشٸن جاعداي جاساعان. ارمەنييانىڭ اقپارات قۇرالدارىنىڭ جازۋىنشا, Flash كومپانيياسى 65 جاستاعى ەكس-پرەزيدەنتتٸڭ جاقىن دوستارىنىڭ بٸرٸ بارسەك بەگلاريانعا تيەسٸلٸ.
ارمەنييا ٷكٸمەتٸ جاعدايى ناشار مىڭداعان فەرمەرلەردٸ بەنزينمەن قامتاماسىز ەتۋٸ ٷشٸن Flash كومپانيياسىنا 3,8 ميلليون دوللار بٶلگەن. ارنايى تەرگەۋ قىزمەتٸنٸڭ دەرەگٸنشە, Flash-تٸڭ بەسەكەلەسٸ "ماكسحۋر" كومپانيياسى ارزان باعا ۇسىنسا دا, بايقاۋدان ٶتپەي قالعان. ەگەر ول كومپانييا تەندەردٸ جەڭگەن بولسا, ٷكٸمەتتٸڭ كٶپ قاراجاتتى ٷنەمدەپ قالۋى مٷمكٸن ەدٸ.
سەرج سارگسيان "ٸستٸڭ ساياسيلانعانىن" ايتىپ, تاعىلعان ايىپتاردى جوققا شىعاردى. ەگەر سوتتا بۇرىنعى پرەزيدەنتتٸڭ كٸنەسٸ دەلەلدەنسە, 4-8 جىل ارالىعىندا باس بوستاندىعىنان ايرىلۋى مٷمكٸن.
ارمەنييانى 2008-2018 جىلدار ارالىعىندا باسقارعان سەرج سارگسيان 2018 جىلى سەۋٸر ايىندا ٷكٸمەتكە قارسى نارازىلىق جالعاسىپ جاتقان كەزدە قىزمەتٸنەن كەتتٸ. جاڭا پرەمەر-مينيستر نيكول پاشينيان باسقاراتىن جاڭا ٷكٸمەت جەمقورلىقتى جويۋعا ۋەدە بەرٸپ, بۇرىنعى باسشىلاردىڭ ٷستٸنەن ٸس قوزعالعان.
