Armeniiada «Abai-175» biregei mereitoilyq jinaǵy basslyp shyǵýǵa daiyndalýda. Jinaqqa armian tiline aýdarylǵan Abai týyndylarynyń aýdarmalary enedi. Bul týraly Erevan memlekettik ýniversiteti (EMÝ) Túrkologiia kafedrasynyń meńgerýshisi, jinaqty daiyndaý jónindegi shyǵarmashylyq toptyń múshesi Aleksandr Safarian QazAqparatqa bergen suhbatynda aitty.
A.Safariannyń aitýynsha, jinaqtyń biregeiligi - Abaidyń kóptegen eńbekteri tuńǵysh ret armian tilinde basylyp shyǵady. Keńes dáýirinen beri qoldanysta júrgen shyǵarmalardyń armian tilindegi aýdarmalary qazirgi armian tiliniń normalaryn eskere otyryp redaktsiialanatyn bolady. Jinaq armiandyq ǵylymi jáne stýdenttik orta ókilderi úshin qundy oqý quraly, sonymen qatar armian oqyrmandary úshin qyzyqty ádebi shyǵarma bolady.
«EMÝ Qazaqstannyń Armeniiadaǵy Elshiligimen birlese otyryp, biregei jańa «Abai-175» mereitoilyq kitabyn shyǵarýdy josparlap otyr. Kitap úshin arnaiy alǵy sóz jazylǵan. Jinaqqa armian tilinde alǵash ret shyǵatyn «Qara sózder» enedi. Sondai-aq, Muhtar Áýezovtiń «Abai joly» dilogiiasy negizinde fýndamentaldy epikalyq romanyn qaita basyp shyǵarý josparlanǵan. Bul roman armian tilinde jariialandy, biraq sodan beri jarty ǵasyrdan astam ýaqyt ótti», - dedi A.Safarian.
Ol Abaidyń Qazaqstannyń eń uly aqyndarynyń biri ǵana emes, sonymen birge mádeni murasy barlyq adamzattyń bailyǵy bolyp tabylatyn aqyn ekenin aitady. Atap aitqanda, EMÝ-diń shyǵystaný fakýltetinde oqý baǵdarlamasy aiasynda stýdentter uly Abaidyń shyǵarmashylyq murasymen tanysady. Osy turǵyda jańa jinaq osy murany zertteýde aitarlyqtai kómek bolady.
«Búgingi armian stýdentteri Abaidy orys tiline aýdarý arqyly kóbirek biledi. Sonymen birge, lingvist retinde Abaidyń keńestik kezeńdegi shyǵarmalarynyń armian tilindegi aýdarmalary onyń ulylyǵyn asha almaǵanyn ókinishpen atap ótken jón. Sondyqtan biz kórkem aýdarma sheberlerin, aýdarmashy aqyn-jazýshylardy jańa basylymdy daiyndaý isine shaqyrdyq», - dep sózin qortyndylady A.Safarian.
Abai shyǵarmalaryn armian tiline aýdarýdy tájiribeli armian aqyny-aýdarmashysy Varýjan Hastýr júzege asyrady. Ol Shákárim, Maǵjan Jumabaev, túrkimen ádebietiniń klassigi Maqtymquli Fragi, sonymen qatar Omar Haiiamnyń shyǵarmalaryn aýdarý arqyly tanymal boldy.
