Armeniia premer-ministri Nikol Pashinian 9 mamyrda Taýly Qarabahqa bardy. Ol premer-ministr bolyp bir kún buryn ǵana sailanǵan.
Armeniia jetekshileri bul aimaqqa 9 mamyrda barýdy dástúrge ainaldyrǵan. Dál osy kúni Armeniia baqylaýyndaǵy ásker 1992 jyly Taýly Qarabahtaǵy Shýsha qalasyna baqylaý ornatqan. Taýly Qarabah astanasy Stepanakert qalasynda Pashinian jáne aimaq basshysy sanalatyn Bako Saakian aimaqtaǵy janjal kezinde jáne Ekinshi dúniejúzilik soǵysta qaza bolǵan sarbazdar eskertkishine gúl qoidy.
Odan soń Pashinian men Saakian Shýsha qalasyna bardy.
Armeniia parlamenti Pashiniandy premer-ministr qyzmetine 8 mamyrda sailap, elde birneshe aptaǵa sozylǵan narazylyq aktsiialary aiaqtaldy. 8 mamyrda parlament aldynda sóilegen Pashinian "Taýly Qarabahqa ózin-ózi aiqyndaý quqyǵy beriletinin" málimdegen. Biraq keiin ol Taýly Qarabah ókilderi qatysqan jaǵdaida ǵana kelissóz ótkizetinin málimdegen.
Baký Pashiniannyń Taýly Qarabahqa barý josparyna kóńili tolmaitynyn bildirdi. Ázirbaijan Syrtqy ister ministrliginiń baspasóz hatshysy Hikmat Gadjiev 8 mamyrda málimdeme jasap, qazir okkýpatsiiadaǵy Taýly Qarabah qashanda Ázirbaijannyń ajyramas bóligi ekenin eskertken. Eki memleket te Taýly Qarabahtyń táýelsizdigin moiyndaǵan joq.
Armeniia men Ázerbaijan arasynda 1990 jyldary daýly Taýly Qarabah aimaǵyna qatysty qarýly janjal shyǵyp, 30 myń adam mert boldy. Armeniia men Ázerbaijan arasy osy aimaqqa bailanysty áli nashar.
